AXA define les declaraciones d'Areces como "intolerantes y autoritaries"

"Al traviés d'una nota de prensa roblada pol so presidente, Xosé María Estrada Janáriz, l'Aconceyamientu de Xuristes pol Asturianu critica duramente les declaraciones que ficiera'l presidente del Principáu d'Asturies, Vicente Álvarez Areces, pa la revista ""Interviu"".

L'asociación de xuristes diz sentir ""tristura y vergoña énte'l despreciu que'l señor Areces amuesa pol ordenamientu xurídicu cola afirmación de que nin elli nin el PSOE tán pel llabor de permitir l'usu de la llingua asturiana dientro de l'Alministración nin pola obligatoriedá de la so enseñanza"".

Dende'l puntu de vista de los xuristes, son éstes ""dos obligaciones que tán impuestes a tolos poderes públicos, estatales y rexonales, pelos artículos 10 y 8, respeutivamente, de la Carta Europea de les Llingües Rexonales o Minoritaries, tratáu fechu al amparu del Pautu Internacional de Drechos Civiles y Políticos de les Naciones Xuníes y del Conveniu del Conseyu d'Europa pa la Proteición de los Drechos Humanos y de les Llibertaes Fundamentales, y ratificáu por España nel añu 2001 siendo don Josep Piqué Ministru d'Asuntos Esteriores"".

L'Aconceyamientu fai notar tamién ""la ignorancia qu'amuesa'l presidente del Principáu d'Asturies al afitar que nun ta a favor ""de la oficialidá nin de la cooficialidá"", cuando, l'asturianu namás pue ""ser cooficial col castellán, porque otra cosa nun pue constitucionalmente ser demientres Asturies seya parte d'España"".

D'otru llau, califiquen les declaraciones d'Areces como ""fonderamente intolerantes y autoritaries"" al nun respetar los ""drechos fundamentales de tola ciudadanía, mesmamente de les minoríes"". Asina mesmo, y pa finar, acusen al presidente de faltar a la verdá cuando asegura que la xente d'Asturies ""tien votao mayoritariamente escontra la oficialidá de la so llingua tradicional"", porque ""non solo nun ye verdá"" sinón que, nel casu de facelo, ""el resultáu sedría, talu que dicen les encuestes sociolóxiques, perfavoratible""."