Creáu n'España l'intergrupu parlamentariu d'apoyu al pueblu saharaui

"L'intergrupu parlamentariu pal Sáhara, formáu por diputaos de tolos grupos políticos y que busca apoyar al pueblu saharaui, quedó constituyíu esti llunes nel Congresu, de cara a la nueva llexislatura, según informó'l Grupu Parlamentariu Socialista.

L'intergrupu persigue como oxetivu fundamental ""caltener l'apoyu al pueblu saharaui"" y ""apoyar la so causa en tolos ámbitos políticos y de cooperación pa llegar a parar una situación insostenible tanto pola so llarga duración como por ser contraria a los Derechos Humanos"", y siempre ""en base a la orientación"" de les resoluciones de Naciones Uníes, señaló'l grupu nun comunicáu.

Los parlamentarios miembros del intergrupu van trabayar a lo llargo de tola llexislatura por ""caltener vivu"" nel Congresu'l ""interés pol pueblu saharaui"" al traviés de la presentación d'iniciatives parlamentaries frecuentes, añade la nota. Tamién se comprometen a sirvir d'enllace ente la solidaridá de la sociedá civil y el Gobiernu en temes saharauis, asina como n'exercer la diplomacia parlamentaria, tanto cola sociedá civil que s'interesa polos saharauis, como con representantes del Frente Polisariu pa consensuar actividaes y compartir conocencies.

Constitúi l'intergrupu la diputada socialista Fátima Aburto, qu'exerce amás como coordinadora, xunto a los sos compañeros de partíu Yolanda Casaus, Juan Moscoso, José Antonio Pérez Tapias, Ana María Chacón y Ana Cano. Xunto a ellos, los ""populares"" Francesc Ricomá, Guillermo Mariscal y Carlos Casimiro; Jordi Xuclá por CiU; Aitor Esteba pol PNV; Gaspar Llamazares, por ERC-IU-ICV y José Luis Perestelo pol Grupu Mistu. Toos ellos apostaron, según la nota, por un consensu ente los grupos sobre'l Sahara ""siempre que seya posible""."