La UE podría eliminar definitivamente les sanciones a Cuba

"La Unión Europea (UE) entamará esti martes una serie d'alderiques col envís de decidir si elimina o non definitivamente les sanciones impuestes a Cuba nel 2003 dempués de la detención de 75 disidentes políticos. Sicasí estes sanciones nun s'apliquen dende l'aú 2005.

La UE tien de revisar en xunu, como fai tolos años, la so política común hacia la islla. Hai un añu, los Ventisiete ofrecieron-y a Cuba un diálogu ensin condiciones previes, anque ensin suprimir finalmente les sanciones.

Los alderiques entamarán col aconceyamientu del Comité d'América Llatina de la UE (Colat), onde van dase cita representantes de los Ministerios d'Esteriores de los Estaos Miembros. Les discusiones treslladaránse dempués al Comité Políticu y de Seguridá (COPS) pa pasar darréu al Comité de Representantes Permanentes (Coreper), que va aconceyase colos embaxadores de los Estaos Miembros acreditaos ante la UE.

La decisión final van adoptala por unanimidá los ministros d'Esteriores nel so conceyu del próximu 16 de xunu. República Checa y Reinu Uníu apaecen como los países que s'amuesen más desconfiaos. Sicasí, el Gobiernu español, que marcó tradicionalmente la orientación de la política europea hacia Cuba, ve con ""moderáu optimismu"" la posibilidá de que la UE elimine definitivamente les sanciones.

La so postura ye qu'eses midíes tán na práutica suspendíes, polo que na actualidá nun aporten nada, al revés, yá que Cuba pidió la so eliminación. Tamién el comisariu européu de Cooperación al Desarrollu, Louis Michel, que viaxó a L'Habana'l pasáu mes de marzu, apostó públicamente pola eliminación definitiva de les sanciones, ""condición necesaria pa recuperar el diálogu políticu formal cola UE y la cooperación cola Comisión"", dixo la selmana pasada.

España estableció con Cuba n'abril del 2007 un mecanismu de diálogu sobre la situación de los derechos humanos na islla que yá s'aconceyaron en dos ocasiones y nun marcu que-y permitió a les autoridaes españoles pidieron la lliberación de los presos políticos. A partir d'una visita del ministru d'Asuntos Esteriores de Cooperación, Miguel Ángel Moratinos, a L'Habana neses feches, España tamién recuperó la so cooperación cola islla.

Cuba lliberó en febreru pasáu a cuatro presos políticos del grupu de los 75 disidentes arrestaos na época de represión de la primavera del 2003, obligándolos a exiliase n'España. Dempués de xestos como ésti, L'Habana quier que la UE respuenda con dalgún xestu qu'amuese la so voluntá de normalizar les rellaciones."