El Farho Xixón Baloncestu perdió col Illescas y l'ascensu a la LEB Oru

"El Farho Xixón Baloncestu perdió la final de la Fase d' Ascensu a la Lliga LEB Oru col Illescas pol resultáu de 78 a 68 y con ello la posibilidá de xugar l'añu que vien nesa categría.

El partíu decidióse nos dos últimos minutos, pues faltando esi tiempu'l resultáu yera de 69 a 68 favoratible a los toledanos, que con un 9 a 0 nesos minutos finales venceyaron l'alcuentru del so llau. Nesti partíu los asturianos tuvieron un pilancu perimportante, Matt Kiefer púnxose malu dempués del pimer partíu de la Fase col Axarquía y tuvo que ser hospitalizáu y anque xugó fízolo en condiciones mui precaries. Al descansu l'alcuentru 'l resultáu yera de 40 a 44 pa los xixoneses, que nel segundu cuartu pasaron a controlar el partíu.

Amás al entamu'l tercer periodu llegaron a tener una ventaya de seis puntos, pero na segunda parte los asturianos namás que diben encestar venticuatro puntos, doce en caún de los dos periodos, y faltando poco más d'un minutu pa finar el tercer cuartu los toledanos punxéronse delantre nel marcador y yá diben talo hasta'l pitíu final, a lo cabero'l tercer cuartu'l resultáu yera de 57 a 55. Nel últimu cuartu les ventayes de los castellanomanchegos diben enanchándose y namás que los triples de Gunnarsson averaben a los asturianos, llegándose a esos dos caberos minutos nos que, los toledanos xugaron meyor, y algamaron l'ascensu a la LEB Oru.

Enantes los xixoneses ganaran al Axarquía malagueñu por 79 a 84 nun partíu que se decidió nel últimu cuartu del llau asturianu, pues nos trés primeros cuartos los malagueños foron ganando. Al descansu los andaluces ganaben por seis puntos, 42 a 36. Amás nel tercer cuartu la ventaya del Axarquía llegó a ser de diez puntos, 59 a 49, pero los xixoneses llegaron a dexala en cuatro cuando fino'l periodu, 59 a 55. Nel últimu cuartu foi cuando'l partíu cayó del llau asturianu con un parcial de 0 a 11 y ponese con un 59 a 66. Amás la mancadura d'un de los meyores xugadores del Axarquía, Paulao Freites, foi otru de los fechos que echaron un gabitu pa que'l Farho Xixón acabara ganando."