Los Xueves ‘De Castilletes y Carbón’ lleven cuatro charres y una esposición a Ciañu

‘Una visión sobre la canción asturiana’, a cargu d’Ismael González Arias, va ser la conferencia qu’abra los Xueves ‘De Castilletes y Carbón’ en Ciañu. Ésta ye la estaya dedicada a conferencies de les VII Xornaes Culturales ‘De Castilletes y Carbón’.

El Centru de Referencia de la Cultura y la Llingua Asturiana Casa de los Alberti de Ciañu acueye mañana la primer sesión d’esta actividá qu’entamen la Fundación Nuberu  y el Conceyu de Llangréu. Trátase d’una charra dedicada a la canción asturiana que va poner González Arias dende les 20 hores.

El xueves siguiente’l convidáu va ser l’escritor y académicu Jose Ramón Iglesias Cueva, que va falar de ‘Lliteratura y mina’, pa continuar col recital poéticu ‘Compañera dame tira’ (día 17)  nel que, cola coordinación de Chechu García, van participar les poetes asturianes Lurdes Álvarez, Laura Marcos, Solinca Turbón y Raquel F. Menéndez. Estes xornaes van rematar cola intervención d'Alberto Rubio, que va lleer la ponencia ‘Movimientu obreru n'Asturies’ el día 24.

L’actividá d’este xornaes culturales compleméntase cola esposición ‘La Mina y la mar’ que se pue visitar demientres tol mes na mesa Casa los Alberti. Enantes, n’ochobre, celebróse’l ciclu de cine ‘Baxando pa la galería’.