Ana Cano treslláda-y a la presidenta de la Xunta Xeneral la propuesta de l'Academia no tocante a la Oficialidá

"L'Academia de la Llingua presentó-y al parlamentu asturianu una propuesta d'aprobación de la oficialidá del asturianu na reforma del Estatutu d'Autonomía, espresada al traviés d'una llei ""consensuada"" que desarrollaría los sos conteníos, y d'un alcuerdu na cámara que diba fixar el presupuestu destináu a esti fin.

Tal y como adelantara na celebración del Día de les Lletres, el pasáu vienres 9 de mayu, la presidenta de l'Academia, Ana Cano, entregó-y el testu de la propuesta a la presidenta de la Xunta Xeneral del Principáu, María Jesús Álvarez, al finar la sesión plenaria d'esta mañana, con intención de que la mesma seya tresllada a los grupos políticos que participen na redaición de la ponencia del nuevu Estatutu d'Autonomía.

Nel testu entregáu plantéguense tres puntos. El primeru diz que ""l'Estatutu d'Autonomía d'Asturies declara la cooficialidá del asturianu, xunto col castellán, de manera que se reconoz el derechu de los ciudadanos al so usu"". Un segundu puntu esplica que ""una llei del Principáu conseñará exautamente los conteníos que se-y quieren dar a la cooficialidá; ye dicir, el modelu d'oficialización. Tal llei habrá pautase poles fuerces polítiques parlamentaries ya inxerirá les fases de la so puesta en práutica"". Por últimu, el tercer puntu afita que ""un alcuerdu parlamentariu, robláu poles tres fuerces polítiques, va fixar, nun marcu de caltenimientu y estabilidá nel tiempu, el coste económicu de la cooficialidá o lo que ye lo mesmo, va señalar hasta ónde ye posible llegar económicamente na financiación d'esta figura xurídica"".

De la mesma manera, l'Academia ofreció ""tola so capacidá y autoridá moral"", asina como la so ""influencia social"" na collaboración coles instituciones pa la puesta en marcha de la midida.

Ana Cano destacó'l ""tratu amable"" d'Álvarez y anunció que la presidenta va proceder a treslladar la so propuesta a los grupos parlamentarios pa la so discusión. Al final del alcuentru, Cano señaló que ""nun se debería perder esta oportunidá histórica qu'ufierta la reforma del Estatutu pa solucionar el problema llingüísticu que tenemos"". ""Si queremos que la llingua asturiana siga viviendo y que seya normal dientro de la sociedá asturiano hai que dotala de la ferramienta llegal que lo faiga posible"", añadió, en declaraciones a los medios.

Lo mesmo que se señala na propuesta, la presidenta de l'Academia afirmó que ""lo qu'hai hasta esti momentu (Llei d'Usu y planes de normalización) nun ye bastante, y hai montones de problemes que nun se puen solucionar más que cola declaración de cooficialidá"".

Ente estos problemes señaló la ""disminución dramática del númberu de falantes, la enseñanza amenorgada práuticamente a la etapa d'Educación Primaria y a la rede pública, l'ausencia d'una formación reglada del profesoráu de Primaria y Secundaria, la escasa presencia nos medios de comunicación, los problemes de discriminación pol usu de la llingua, asina como la falta de reconocencia de la llingua n'instancies llegales"". Toos estos factores, según l'Academia, espeyen ""el peligru de desapaición del nuesu patrimoniu llingüísticu""."