Rajoy xura’l so cargu como presidente del Estáu

Mariano Rajoy xuró esti llunes nel Palacio de la Zarzuela’l so cargu como presidente del Estáu. L’astención socialista’l sábadu nel Congresu, a esceición de quince diputaos que votaron ‘Non’, ente los que nun taben nengún de los dos asturianos, permite al popular encarar la so segunda llexislatura al frente del Gobiernu.

“Xuro cumplir fielmente les obligaciones del cargu como presidente del Gobiernu, con llealtá al Rei, y guardar y facer guardar la Constitución, asina como caltener el secretu de las deliberaciones del Conseyu de Ministros”, foi la forma emplegada esta mañana por Rajoy. Ésta yera la primer ocasión na que Felipe VI taba presente nesti actu na Zarzuela, onde’l xueves va tornar el presidente estatal a presentar al monarca nuevu’l so equipu de Gobiernu pa esta llexislatura, del qu’entovía nada se sabe.

Rajoy va poder presidir l’Estáu pa los cuatro años próximos gracies a l’astención del PSOE, lo que permitía desbloquiar una situación que conducía direutamente a unes terceres eleiciones. Sicasí, hebo diputaos socialistes que nun acataron la decisión del Comité Federal y votaron ‘Non’ al gallegu, un total de 15, ente ellos los 7 del PSC y nengún de los dos asturianos. Nesi sen, Adriana Lastra dixo astenese “por imperativu”.

L’ex secretariu xeneral del PSOE Pedro Sánchez, partidariu del ‘Non’, renunció hores enantes de la votación al so escañu. El so oxetivu ye competir pa recuperar el cargu nel Congresu qu’habría de convocar la xestora de Javier Fernández en feches próximes y nel que Susana Díaz será’l so rival máximu.

Les formaciones que votaron a favor de la investidura de Rajoy foron Foro –formación cola que los populares foron en coalición n’Asturies–, UPN, Ciudadanos y Coalición Canaria-Partido Nacionalista Canario, sumando un total de 170, por 111 en contra y 68 astenciones.