L'Academia de la Llingua entrega los sos premios añales

"L'Academia de la Llingua entregó, esti vienres 30 de mayu nel hotel NH d'Uviéu, los sos premios añales correspondientes a les estayes d'Investigación, Llectures pa Rapazos, Creación Lliteraria, Teatru y Recoyida de Material Lliterario Escrito. Na entrega tuvieron presentes la presidenta de l'Academia de la Llingua, Ana María Cano; y l'ayalgueru de la institución, Carlos Lastra López.

Nos concursos d'Investigación (Recoyida de material toponímico oral, Recoyida oral de léxicu asturianu, y Concursu d'investigación llingüística), resultaron ganadores Antonio Alonso de la Torre García y Francisca Iglesias Álvarez pol so trabayu Toponimia de la parroquia de Trespena (Proaza); y Pablo Suárez García pol so Diccionariu politécnicu de la llingua asturiana (Tomu III, ciencies Matemátiques). Los miebros de xuráu, formaos por Ana María Cano como presidenta, José Luis García Arias como vocal y Corsino García Gutiérrez faciendo de secretariu, decidieron dexar ermu'l concursu de Recoyida oral de léxicu asturianu.

No que cinca al Concursu de Llectures pa rapazos el xuráu, compuestu por Urbano Rodríguez Vázquez como presidente, Vicente García Oliva como vocal y faciendo de secretariu Pablo Xuan Manzano Rodríguez, alcordaron conceder el premiu a los trabayos: Olaya n'África, de la que ye autora Helena Trexu Fombella y Cuentiquinos del versu, de la que son autores José Luis Campal y Aurora Sánchez.

El Concursu de creación lliteraria ""Llorienzu Novo Mier"", pela so parte, foi esti añu pa la narración titulada Díes d'iviernu de la que ye autor Xurde Fernández Fernández, actuando nesti casu como xuráu Miguel Ramos Corrada como presidente, Carlos Rubiera Tuya como vocal, y faciendo de secretariu Xosé Ramón Iglesias Cueva.

No tocante al concursu de teatru el ganador d'esti añu foi Josep Carlos Laínez pola obra titulada Thule. Nesti casu el xuráu tuvo formáu por Miguel Ramos Corrada como presidente, Adolfo Camilo Díaz como vocal, y faciendo de secretaria Marta Mori d'Arriba.

Pa finar, en referencia a los Concursus de recoyida de material lliterario escrito, alcordóse entrega-yos el premiu ex-aequo a José Luis Fernández y Aurora Sánchez pol trabayu Poesíes non recoyíes de Marcos del Torniello de 1899 a 1930; ya Inaciu Galán y González polos trabayos Cosiquines de pocu más o menos d'Antonio Pérez González, y a Poesíes asturianes en Nostalgia.

Na edición de los concursos d'esti añu quedaron ermos, amás del mentáu de recoyida oral, el Concursu d'investigación sobre lliteratura asturiana, Concursu de material lliterario oral, y Concursu de curtios cinematográficos."