La flota asturiana caltién l'actividá pese a la convocatoria de paru

"La flota asturiana caltién l'actividá pesie a la convocatoria de paru entamada esti xueves pa protestar pola ""grave crisis"" qu'atraviesa'l sector pesqueru por mor de la escalada de precios del gasoleu.

El presidente de la Federación de Cofradíes d'Asturies, Dimas García, dixo ""nun tener constancia"" de la esistencia de barcos amarraos. La Federación d'Asturies, lo mesmo que la del restu del Cantábricu, opúnxose a esta convocatoria al tar la flota de baxura nel mayor momentu d'actividá del añu.

""Llamé a delles cofradíes d'Asturies y en nengún casu me dixeron qu'haya barcos amarraos"", espunxo García. Na cofradía Virxen de les Marees d'Avilés, que concentra'l mayor volume de descargues de pescáu d'Asturies, tampoco hai hasta'l momentu paros.

La Confederación Española de Pesca (Cepesca) convocó pa esti vienres una concentración énte'l Ministeriu de Mediu Ambiente, Mediu Rural y Marín. La crisis pola que ta pasando'l sector ta motivada polos altos costos d'esplotación de los buques, sobre manera pola xuba del preciu del gasoleu - que se cuadruplicó en cinco años, al pasar de 0,18 euros el llitru en mayu del 2003 a 0,75 euros nesti momentu -, asina como pol baxu preciu del pescáu en primer venta, que se caltién nos mesmos niveles qu'hai 20 años.

Nun comunicáu, Cepesca insistió en que si'l departamentu d'Elena Espinosa nun adopta midíes urxentes pa garantizar la estabilidá y sostenibilidá del sector ""el pecáu pue desapaecer de la dieta de los españoles, asina como tamién les empreses y los trabayadores"", diz el comunicáu."