La viesca centra’l XVII Seminariu d’Estudios Asturianos de la Fundación Belenos

La Puela torna a acoyer una edición nueva del Seminariu d’Estudios Asturianos de la Fundación Belenos, la decimosétima, pa la que yá ta abierta la matrícula. Les actividaes van celebrase los díes 19 y 20 de payares baxo’l nome de ‘Asturies: la viesca habitada’.

Tres centrar los dos seminarios últimos en bébores propies como la sidra y el vinu, y na cultura del gochu, la Fundación Belenos centra la so mirada nuna entidá clave pa entender el país, como ye la viesca. Al traviés de cinco conferencies, los asistentes van conocer la importancia de los árboles na nuesa sociedá, sobre los productos que se pueden sacar de la madera y inclusive lleendes alredor de la mesma, ente otros asuntos.

L’actividá va principiar el sábadu a les 10 hores cola inauguración oficial, actu que va contar cola presencia del alcalde, José Antonio Mesa. Darréu, el naturalista Ignacio Abella va abrir les charres cola intervención ‘L’árbol y la viesca na sociedá tradicional’, a la que va siguir la doctoranda de la Universidá d’Uviéu Maider Fernández Zúñiga, que va falar de ‘Les madreñes: decoración tradicional y el so posible significáu’.

Enantes de la xinta, prevista pa les 14.45 hores, va haber otra charra, entitulada ‘Cachapos: una güeyada hestórica, xeográfica y tipolóxica’, a cargu de Alfonso Fernández Canteli, profesor eméritu de la Universidá d’Uviéu. Tres garrar fuercies, a les 17 hores, l’etnógrafu y miembru de la Fundación Belenos, va sorprender a los presentes con ‘L’ánima de la viesca: mitos y llendes’.

La intervención cabera del seminariu va protagonizala a les 18 hores l’inxenieru de Montes y sociu de Biesca Inxeniería, Adolfo Blanco, que va falar de ‘Viesques y xestión forestal n’Asturies: una visión integral y propuestes de futuru’. Llueu, como ye vezu, los presentes van poder disfrutar d’una cena a les 21.30 hores pa siguir col tradicional filandón del seminariu con música del país qu’acueye, a partir de les 23.30 hores, el Café Centro.

Tornería y paxos

La xornada de domingu, baxo’l nome de Conceyu Abiertu, va principiar a les 11 hores con una amuesa de tornería tradicional a cargu de Vitorino García, tixileiru de Trabáu. Tres la mesma, Xosé García ‘Llábana’ va amosar, en comuña cola xente de L’Alcuentru, cómo se faen los paxos. La xinta, prevista pa les 14.30 hores, va servir como piesllu a esta edición del seminariu.

Les persones que quieran formalizar la matrícula pa participar nesta actividá han de facer un ingresu de 30 euros, axuntando’l nome y apellíos, na cuenta bancaria de la Fundación Belenos: ES83-3059-0086-0923-4865-2823. Nel casu de que s’escueya tamién la opción d’agospiu con pensión completa –inclúi les dos xintes y una cena– en ‘La Nueva Allandesa’, han de sumar 60 euros a la cantidá inicial. Pa más información sobre’l XVII Seminariu d’Estudios Asturianos pue contautase cola Fundación Belenos nos teléfonos 985.24.48.11 y 616.242.319, o al traviés del corréu electrónicu seminariubelenos@gmail.com.