Rajoy afirma nel Congresu que les reválides nun van tener valor académicu

Tres la esitosa xornada de fuelga del miércoles na escuela pública, con un siguimientu del 90 por cientu n’Asturies según el Sindicatu d’Estudiantes, Mariano Rajoy anunció esti xueves na sesión d'investidura que les reválides nun van tener valor académicu. SUATEA califica les sos declaraciones de “burlla macabra”.

El presidente del Estáu en funciones, que se caltendrá’l sábadu nel cargu tres el cambiu de posición nel PSOE que favorez l’astención na segunda votación de la sesión d’investidura del popular, fixo l’anuncia mientres la so réplica a la intervención del voceru socialista, Antonio Hernando. Rajoy propunxo un gran pautu d’Estáu n’Educación y, mientres se llegue al mesmu, apuntó que les reválides previstes na LOMCE al final de la ESO y Bachilleratu nun van tener valor académicu.

Esti cambiu de postura llega tres la xornada de fuelga convocada ayeri en tol Estáu pola Confederación Española de Asociaciones de Padres y Madres de Alumnado (CEAPA), a la que pertenez l'asturiana FAPA Miguel Virgós, y el Sindicatu d'Estudiantes, paru al que se sumaron munchos alumnos de la escuela concertada. Ésta foi un ésitu, con un siguimientu del 90 por cientu nel país según los estudiantes, ún de los más altos del Estáu. Tamién contó con una asistencia importante na manifestación xunitaria celebrada pela tarde n’Uviéu.

“Rajoy pretende engañar una vez más”

L’anuncia de Rajoy nun foi bien acoyida pol Sindicatu Unitariu Autonómu de Trabayadores de la Enseñanza d’Asturies (SUATEA), qu’afirma que coles sos pallabres “pretende engañar una vez más a la comunidá educativa” al tiempo que sirven “de coartada pa que la so previsible investidura nun sía considerada como una traición en toda regla a los compromisos suscritos por tolos partíos salvo'l PP”, esto ye, la derogación de la LOMCE. “Lo qu'agora propón Rajoy ye caltener la situación actual: yá taba previsto nel calendariu d'implantación de la LOMCE qu'esti cursu la reválida de cuartu d'ESO nun tendría efectos académicos. Al respective de la de segundu de Bachilleratu, la PAU yá nun existe; foi sustituyida pola reválida pero desconozse cómo se va a entamar”, apunta.

"Les reválides van poder ser usaes como moneda de cambéu nuna transacción que pretende caltener el calter segregador, xerarquizante y antidemocráticu de la llei. La privatización del sistema educativu, tresnáu col retayu de miles de millones esixíos pola Comisión Europea, abre un negru panorama pa la enseñanza pública”, añade’l sindicatu educativu.