Greenpeace felicita al Gobiernu asturianu por refugar el plan urbanísticu de Verdicio

"La organización ecoloxista Greenpeace felicitó públicamente a la Comisión d'Urbanismu y Ordenación del Territoriu d'Asturies por refugar l'aprobación definitiva de la Revisión Parcial de les Normes Urbanístiques del Conceyu de Gozón, na parroquia de Verdicio, que prevía llevantar un conxuntu deportivu - residencial.

El proyeutu contemplaba un campu de golf de 27 furacos y otres construcciones deportives anexes, una casa club, dos hoteles, viviendes unifamiliares y plurifamiliares, locales comerciales y otres construcciones.

Nun comunicáu, la organización manifestara la oposición a la revisión urbanística propuesta pola sociedá Proescor-Costa S.L., qu'afeutaba a 1.669.358 metros cuadraos, tando más de la metá de los mesmos dientro nel Paisaxe Protexíu del Cabu Peñes y nel ámbitu del Llugar d'interés Comunitariu ""Cabu Bustio Lluanco"", integráu na rede europea Natura 2000.

Ensin facer casu d'esta proteición, el Conceyu de Gozón aprobó de primeres la urbanización de 150.000 metros cuadraos d'estos suelos protexíos.

La organización diz ""tar mui contenta de que'l Gobiernu del Principáu d'Asturies respete la normativa y protexa la so mariña y el so mediu ambiente"". Pa Greenpeace ""ye un exemplu a siguir por toles alministraciones""."