La seronda y les sos costumes disfrútense estos díes n'Avilés

La XIV Seronda n'Avilés trai a la villa música, gastronomía y tradiciones d'esta estación.

La Federación d'Asociaciones Xuntanza, col sofitu del Conceyu d'Avilés, entama esti festival dende l'añu 2009, siguiendo'l llabor qu'años anteriores facía cola Asociación d'Investigación Etnográfica y Folclórica Escontra'l Raigañu. Les actividaes van celebrase na plaza Domingo Álvarez Acebal y pretenden enseñar les costumes y llabores específiques de la seronda n'Asturies; una época de trabayu n'andecha, de collaboración y de tresmisión xeneracional de la nuestra llingua y cultura. Too ello acompañao de música, cuentos, danza y productos bonos, ente los que tampoco nun van faltar el pote de berces, l'arroz con lleche, les castañes y la sidra dulce.

No que se refier a les actuaciones musicales, destaca la celebración d'una Nueche en Danza mañana, a partir de les 23 hores, que va zarrar Tuenda, y el conciertu d'Anabel Santiago y David Varela del sábadu a les 20 hores. Darréu, va siguir una verbena popular con Caldo y Os Rabizos, y El Koku la Manzana.

Otra manera, ta abierta al públicu dende primeros de mes la esposición 'Mitos asturianos' del dibuxante llangreanu Javier Iván Villa que yá percorrió dellos puntos del país. Ésta consiste n'imáxenes d'estos personaxes acompañaes de testos esplicativos, amás d'un audiovisual, y va poder visitase na Casa Municipal de Cultura n'horariu de 11 a 13 hores y de 18 a 21 hores, hasta'l sábadu, y de 11 a 14 hores, el domingu.

El programa completu de la XIV Seronda n'Avilés ye'l siguiente:

Vienres

• 18 hores: apertura de la carpa na plaza de Domingo Álvarez Acebal, con vezos y costumes del amagüestu y ellaboración de sidra dulce, amás d'un chigre con productos de la seronda.
• 19 hores: Banda de Gaitas Picos de Europa-DOP Cabrales.
• 20 hores. inauguración oficial de la XIV Seronda n'Avilés.
• 20.30 hores: Tiempu d'esfoyaza, con Escontra'l Raigañu.
• 22 hores: conciertu de pandeireta galega con Afoutos.
• 23 hores. comienza la Nueche en Danza, con música popular, grupos de pandereta y l'actuación de Tuenda.

Sábadu

• 10 hores: emisión del programa de RPA 'Asturias x 2' en direuto.
• 12 hores: apertura del chigre con comida y bebida (sidra del duernu y castañes amagostaes).
• 13 hores: sesión vermú con Afoutos.
• 14.30 hores: xinta popular (pote de berces y arroz con lleche).
• 16.30 hores: pieslle de la carpa.
• 18.30 hores: apertura de la carpa.
• 19:30 hores: bailles y dances, con Xareu d´Ochobre.
• 20 hores: conciertu d'Anabel Santiago y David Varela.
• 21 hores: verbena popular con Caldo y Os Rabizos, y El Koku la Manzana.