Ibarretxe convocará un referendu reguláu pola llei d'elecciones autonómiques

"El lehendakari, Juan José Ibarretxe, va convocar el próximu 15 de setiembre la consulta que cuenta celebrar el 25 d'ochobre. El proyeutu de Llei de Convocatoria y Regulación de la Consulta Popular, aprobáu el miércoles pol Conseyu del Gobiernu vascu y rexistráu esti xueves nel Parlamentu, establez qu'ésta se desarrolle y realice en base a la Llei que rixe les elecciones autonómiques.

El documentu describe una campaña asemeyada a la de les elecciones al parlamentu vascu y les sovenciones pa los diferentes partíos de cara a la celebración de la consulta, según los escaños qu'algamaren na Cámara autonómica.

El Departamentu de Facienda va poner en marcha creitos necesarios pal so desarrollu. El proyeutu de Llei afirma que, al nun tratase d'una consulta per vía de referendu, en cualesquier de les sos modalidaes, nin ser a llevar implicación xurídica, ""al procesu consultivu nun-y resulta d'aplicación la Llei Orgánica 2/1980, sobre la regulación de les distintes modalidaes de referendu, nin tampoco precisa, poro, la previa autorización del Estáu pa la convocatoria"". Poro, defende la so llegalidá y que ""tien validez política y social dafechu"". Na so esposición de motivos, el testu recuerda que'l 28 de setiembre del 2007 nel alderique sobre política xeneral del Parlamentu vascu, el 'lehendakari' fizo una ufierta institucional de pautu políticu al Presidente del Gobiernu, ""afitada sobre'l principiu de refugu a la violencia y el principiu democráticu de respetu a la voluntá de la sociedá vasca"".

La ufierta ""estendíase"" hasta xunu del 2008 col fin de que'l Plenu del parlamentu vascu, enantes de finar el so periodu de sesiones, ""pudiere confirmar, nel so casu, el pautu políticu si ésti fuere posible, o en casu contrariu, autorizar la realización d'una consulta ensin implicaciones xurídiques col fin de desbloquiar la situación política y abrir un procesu de negociación"". ""El plantegamientu d'una consulta pal entamu de negociaciones preséntase, poro, como alternativa a l'ausencia d'un pautu políticu col Gobiernu español, que se tentó de llograr"", señala'l proyeutu de Llei.

De la mesma manera, señala que, ""al non ser posible llograr un consensu"", l'Executivu vascu, a propuesta del so 'lehendakari' ""consideró oportunu"" plantegar a la Cámara la convocatoria d'una consulta ensin implicaciones xurídiques pa conocer la opinión ciudadana ""sobre l'abertura d'un procesu de negociación p'algamar la paz y la normalización política"". ""Ye dicir, pa exixir a ETA'l fin de la violencia y, nuna situación d'abandonu inequívocu de les armes, posibilitar un procesu de diálogu y per otru llau, p'abrir una negociación ente tolos partíos col oxetivu d'algamar un acuerdu de normalización el que s'establezan les bases d'una nueva rellación ente la Comunidá Autónoma del País Vascu y l'Estáu español"", apunta.
Nesti sen, sorraya qu'esta consulta ""constitúi un instrumentu llegal y democráticu pa que'l pueblu vascu puea exercer llibremente'l derechu fundamental de participación ciudadana nos asuntos de trescendencia que-y son propios"". Poro, manifiesta que ye ""esencial"" el papel del Parlamentu vascu ""nel desarrollu de los principios democráticos y na tutela del exerciciu del derechu fundamental a la participación política de la que gocen los ciudadanos del País Vascu y, en particular, na materialización d'esta consulta"".

Nel artículu únicu del documentu presentáu por Ibarretxe señálase que, ""basándose na presente autorización del Parlamentu vascu"", el 'lehendakari' somete a consulta, ensin implicaciones xurídiques, dos entrugues: La primer d'elles diz: ""¿Ta usté d'acuerdu n'apoyar un procesu de final dialogáu de la violencia, si previamente ETA manifiesta de manera inequívoca la so voluntá de poner fin a la mesma d'una vez y pa siempre?"". La segunda cuestión entruga: ""¿ta usté d'acuerdo en que los partíos vascos, ensin esclusiones, entamen un procesu de negociación p'algamar un Acuerdu Democráticu sobre l'exerciciu del derechu a decidir del pueblu vascu, y que dichu acuerdu seya sometíu a referendu enantes de que fine l'añu 2010?"".

El testu apunta que la consulta va celebrase'l 25 d'ochobre del 2008 y va convocase pol 'lehendakari' el 15 de setiembre. El so desarrollu y realización va regulase pela Llei d'Elecciones al Parlamentu Vascu, ""con unes adautaciones"" y señala que va comprender a los partíos que tienen representación na Cámara autonómica."