Espertos del xenocidiu maya aconceyen col xuez Santiago Pedraz

"El xuez de l'Audiencia Nacional Santiago Pedraz sintió esta selmana'l testimoniu de dos antropólogos espertos nel xenocidiu maya en Guatemala (1978-1984), qu' esplicaron cómo los indíxenes persiguíos polos Exércitos llegaben a ""cocinar de nueche, enterrar a los sos animales en túneles"" y hasta ""tapar con trapos les boques de los recién nacíos pa nun ser descubiertos polos lloros"".

La persecución al pueblu maya provocó más de 250.000 víctimes, de les que más de 45.000 siguen desapaecíes anguaño.
El titular del Xulgáu Central d'Instrucción númberu 1 que lleva esti casu d'alcuerdu cola xurisdicción universal de l'Audiencia Nacional pa los delitos escontra la humanidá. A lo llargo de la primer selmana de febreru'l maxistráu tomó declaración a diez testigos protexíos que-y fueron esplicando nel so despachu les violaciones masives y masacres n'aldees enteres que llevaron a cabu naquellos años l'Exércitu y los denominaos Patrulleros d'Autodefensa Civil (PAC).

Esta selmana, l'antropóloga y profesora de la universidá de California, Beatriz Manz, esperta nes práutiques emplegaes pol Exércitu guatemaltecu pa cola población indíxena a partir de delles investigaciones y viaxes a la zona, esplicó-y al xuez los conocimientos que vien acumulando dende l'añu 1973. ""Les migraciones masives entamaron en 1981 y cobraron la so mayor intensidá en 1982 y 1983, como resultáu de la escalada de la violencia escontra la población"", entamó esplicando esta especialista, quien recordó como ""nel periodu anterior les masacres consistíen en entraes abusives a les aldees, abusos y secuestros"". ""Amás, los militares amosaben, nes sos visites, la llista de los nomes de dalgunos habitantes de l'aldea ensin que dieren esplicación dalguna. La población quedaba sol miéu nel cuerpu. Llueu, vinieron les masacres, qu'incluyíen la destrucción de les aldees y los semaos"".

La esperta esplicó que'l razonamientu de los militares yera: ""si nun tienen culpa, ¿por qué escapen? por dalgo será"". ""El fechu de que los indíxenes nun ficieren casu de los planes del exércitu chocaba col conceutu del 'indiu inútil', inferior, torpe"", añadió.

Amás, esta esperta esplicó cómo, tres les masacres, l'Exércitu creó les llamaes 'aldees modelu', ""siguiendo un modelu de distribución de cases que tracamundiaba la configuración espacial tradicional de les aldees indíxenes, carauterizada por cases asitiaes en sitios distantes. ""Agora, les cases debíen construyise una al llau de la obra, col propósitu de controlar más efeutivamente a la población"", dixo.

""Yera l'Exércitu quien decidía y ordenaba a les families onde debíen vivir, xuntaba nes aldees a diferentes etnies, col oxetivu de xenerar antagonismos y divisiones y de torgar cualquier comunicación que nun fuera n'español"", siguió Manz, al tiempu qu'esplicó que ""tamién semaba la desconfianza ente la población, obligando a unos a denunciar a otros""."