El CAO aconceya col voceru popular Joaquín Aréstegui

"El Partíu Popular d'Asturies va estudiar un modelu pal artículu IV del Estatutu d'Autonomía d'Asturies que-y plantegará'l Conceyu Abiertu pola Oficialidá nos próximos díes, de cara a la so consideranza nel procesu de revisión de la norma que ta desarrollándose nesti momentu.

Ye'l principal alcuerdu al que llegaron esti xueves Fernando Ornosa, voceru del CAO, y el diputáu popular Joaquín Aréstegui, nun conceyu celebráu na Xunta'l Principáu. El Conceyu quier falar sobre'l tema de la oficialidá con tolos grupos políticos representaos na cámara autonómica, pa negociar la posible incorporación de la reconocencia oficial de la llingua nel Estatutu d'Autonomía.

Según esplicó Ornosa al final del alcuentru, el diputáu popular propunxo que'l CAO faiga un modelu del artículu cuartu pa estudialu y tratalu. El voceru del CAO matizó que la organización tien d'estudiar esta posibilidá, pero cuenta con que se faiga asina.

La intención del CAO ye facer un modelu que recueya la reconocencia de la llingua en cuatro ámbitos principalmente: nes rellaciones cola Alministración autonómica, nes rellaciones cola Alministración estatal, na validez xurídica nel ámbitu priváu y nos derechos relativos a los sos falantes, comparables a les otres llingües del Estáu.

"Posición cerril"

Nel conceyu, el PP dixo tar dispuestu a llegar a un consensu nesti tema, pero señaló como principal torga la ""posición cerril"" del Partíu Socialista con respeuto a la cooficialidá d'asturianu y castellán, yá que ""nun quier falar d'ello"". Aréstegui prometió que'l PP va falar lo que faiga falta pero afirmó que la postura del PSOE ye firme nesti sen, polo qu'alvirtió de que la negociación ye difícil, pues p'aprobar la modificación del Estatutu faen falta los tres quintos del parlamentu rexonal.
Ornosa destacó la ""bona sintonía"" ente dambes partes. Énte la preocupación de los populares sobre la posibilidá de que la oficialidá traiga dalgún tipu d'obligatoriedá llegal, el voceru del CAO aseguró qu'únicamente va tratase de voluntariedá de los ciudadanos a la hora d'escoyer una de les dos llingües. Nesti sen, aseguró que'l CAO ta dispuestu a aceptar cualesquier tipu de redaición del artículu cuartu del Estatutu, ""siempre y cuando s'afite que l'asturianu ye la llingua propia d'Asturies y que ye oficial""."