El Senáu da-y el preste a la reforma que potencia l'usu de les llingües oficiales

"El Senáu aprobó esta selmana una moción empobinada a promover la reforma del Reglamentu de la Cámara col envís de que se reconoza y ampare na so actividá ordinaria l'usu oral y escritu de toles llingües que tengan calter oficial y dexó afitao, asina mesmo, qu'esta reforma tien de tener efeutos a partir d'esta mesma llexislatura.

La iniciativa, presentada por Entesa Catalana de Progrés, foi sofitada por tolos grupos parllamentarios quitando'l PP, que defendió que l'usu de les llingües oficiales s'aborde na reforma global del Senáu y nun llimitase a una reforma del Reglamentu de la Cámara Alta porque ye un tema ""de muncha importancia"".

""El nuestru plantegamientu ye mui cenciellu, d'alcuerdu, vamos falar d'esto, pero vamos facelo nel marcu d'una reforma xeneral del Senáu"", argumentó'l senador popular, Pedro Agramunt, dempués de pidir que nun se trate una reforma d'esti tipu ensin l'alcuerdu de tolos grupos que formen la Cámara Alta.

Agramunt recordó que nel añu 2005 yá s'ampliara l'usu de les llingües cooficiales nel Senáu y, dende'l so puntu de vista, dir más allá sería ""violentar"" la Constitución. ""Faigamos les coses con sentíu común - sorrayó - esti tema tien de dir cola reforma del Senáu, vamos ser respetuosos cola nuestra 'magnífica' Constitución"".

Na defensa de la iniciativa, el voceru d'Entesa, Carles Bonet, recordó que la Constitución tamién establez que la salvaguarda y proteición de la diversidá llingüística de les llingües d'España correspuénde-y al Estáu y tolos sos organismos y llamentó que nos últimos momentos seyan poques les instituciones comunes que faen usu d'esa diversidá.

Pela so parte'l senador socialista José Ignacio Pérez Sáez, aseguró que la diversidá llingüística d'España ""nun ye un inventu d'agora"" y reconoció que, si dalguién tien de reconocela, ye'l Senáu. ""Queremos que'l Senáu seya'l símbolu de la pluralidá"", sorrayó."