Les organizaciones que lluchen escontra la malaria n'África, Premiu Príncipe de Cooperación Internacional

"La candidatura conxunta compuesta poles principales organizaciones qu'encabecen n'África la llucha escontra la Malaria foi galardonada col Premiu Príncipe d'Asturies de Cooperación Internacional, fallu que se dio a conocer esti miércoles n'Uviéu.

La candidatura impúnxose a la de la Corte Penal Internacional de L'Haya que tamién foi finalista nes decisiones del xuráu. La candidatura ganadora ta compuesta poles organizaciones Ifakara Health Research and Development Centre (Tanzania), The Malaria Research and Training Centre (Mali), Kintampo Health Research Centre (Ghana) y Centru d'Investigación en Salú de Manhiça (Mozambique).

El xuráu encargáu de fallar el premiu reconoció esplícitamente l'esfuerzu realizáu poles cuatro organizaciones que lideren la llucha escontra la malaria n'África pa ""romper la rellación ente la enfermedá y la probitú"". Nel acta, que lleó'l presidente, Antonio Garrigues Walker, recuérdase que la enfermedá ""amenaza al 40 por cientu de la población mundial"" especialmente nel África subsahariana ""onde muerre un neñu menor de cinco años cada 30 segundos"".

De la mesma manera, el xuráu consideró, amás, l'aportación d'estos cuatro centros pa ""sofitar la investigación, llograr una vacuna eficaz y contribuir a la meyor asistencia nos países nos que trabayen"". Al empar, valoróse especialmente'l trabayu d'estes organizaciones na formación del personal local pa la investigación biomédica y el refuerzu institucional na llucha escontra la malaria.

La candidatura foi propuesta por Mariano Puig, miembru del xuráu del Premiu Príncipe d'Asturies de Cooperación.

En total, fueron 26 candidatures procedentes de 13 nacionalidaes les qu'optaron a esti galardón. Ente los candidatos taben tamién l'ex presidente d'Estaos Xuníos Jimmy Carter, l'ex primer ministru británicu Tony Blair, el Foru Económicu Mundial - Foru Davos -, y la Organización Meteorolóxica Mundial, amás del compositor y activista políticu, Bob Geldof.

El xuráu encargáu de fallar los premios tuvo integráu por María Jesús Álvarez González; Enrique Barón; José María Bergareche; Alicia Castro Masaveu; Milagros del Corral; Consuelo Crespo; Manuel Díaz Ron; Ángeles Espinosa; Jorge de Esteban; Luis Fernández; María Jesús Figa López-Palop; Severino García Vigón; Antonio Garrigues Walker; Isabel Gómez-Acebo; Laura González; María José Hidalgo; Gloria Lomana; Luis Lada; Ricardo Martí Fluxá; José María Martín Patino; María Dolores Masana; Cándido Méndez; Luis Javier Navarro Vigil; Yago Pico de Coaña; Francisco Pinto Balsemo; Mariano Puig; Luis Ruiz de Gopegui; Luis Sánchez-Merlo; Nicolás Sartorius; Gustavo Suárez Pertierra y Teodoro López-Cuesta.

Ésti ye'l segundu de los galardones que se falla dientro de la XXVIII octava edición de los premios qu'otorga añalmente la Fundación Príncipe d'Asturies. El primeru foi'l de Les Artes que foi concedíu a les Orquestes Xuveniles ya Infantiles de Venezuela."