El Comité Federal del PSOE decide astenese y dar el Gobiernu a Rajoy

Con 139 votos a favor y 96 en contra.

Finalmente nun habrá terceres eleiciones y el popular Mariano Rajoy va siguir al frente del Gobiernu estatal. La decisión del Comité Federal del PSOE d'astenese na segunda votación de la sesión d'investidura próxima desbloquea la situación y permite que'l PP, partíu más votáu'l 26-X, gobierne en minoría.

Contra lo que paez un sentir mayoritariu ente les bases del partíu, el non a un Gobiernu de dereches, y pese a mostrase críticos coles polítiques de Rajoy, el Comité Federal decidió con 139 votos a favor (un 58,64 por cientu del total), por 96 negatives, facilitar un Executivu popular. Como llaváu de cara, los sos responsables anuncien un non na primer votación, pa depués, cola so posición, dar les riendes del Estáu al PP.

Queda por ver qué posición va tomar el PSC, decidíu a frayar la disciplina de votu, lo que va ayudar a agravar la crisis de los socialistes, dirixíos por una xestora col presidente d'Asturies, Javier Fernández, al frente. Nueva Canarias, sociu del PSOE, tamién apuesta pol non a Rajoy, según anunció'l diputáu Pedro Quevedo na ronda de consultes del rei d'España que s'anició esta mañana.