IX acusa al PSOE d'irresponsabilidá en materia económica

"Izquierda Xunida-Bloque por Asturies-Verdes acusó al PSOE d'aplicar la política ""de la derecha"", optando pola barra llibre d'ayudes y renunciando a la política de la izquierda.

Amás, al traviés d'un comunicáu, la coalición sorrayó que les declaraciones del secretariu d'Estáu de Facienda confirmen los esmolecimientos qu'IX lleva tiempu espresando. ""La irresponsabilidá de los socialistes dexónos cola despensa vacía agora que vienen tiempos difíciles"", dixo'l coordinador d'IX n'Asturies, Jesús Iglesias.

Dende'l puntu de vista de la coalición, los socialistes apliquen polítiques de dereches como la eliminación de los impuestos sobre'l patrimoniu ""marafundiando les perres de toos con ayudes indiscriminaes como los 400 euros o los 'cheques-bebé'"". ""Malgasten recursos públicos y perdonen impuestos a les rentes más altes cuando hai munches necesidaes nesti país. Una auténtica irresponsabilidá que va tener consecuencies dramátiques pa munches families"", dixo Iglesias.

Pal Coordinador d'Izquierda Xunida n'Asturies ""Zapatero compró votos pero la factura páguenla tolos españoles con 5.000 millones d'euros"". Asina, insistió en que son unos recursos fundamentales pa encarar la crisis. Iglesias añadió que'l Gobiernu tien los bolsos vacíos agora que van facer falta más perres pa prestaciones sociales, afitamientu de los servicios públicos, fomentu de la creación d'emplegu y garantíes nes inversiones que necesita'l país.

Asina aseguró que ""n'Asturies la política del Gobiernu d'Areces va pel mesmu camín"", yá qu'al so xuiciu'l xiru de la derecha ye evidente. ""Apuesten pola enseñanza concertada demientres recorten los presupuestos de la pública, opten polos 'cheques-bebés' demientres refuguen la creación de más places públiques nes escueles de 0 a 3 años, o ponen en marcha la privatización de los servicios sociales n'Asturies"", dixo."