El Trisquel celebra'l cumpleaños con Felpeyu

"Esti xueves día 29 Xixón ta de cumpleaños, yá qu'El Trisquel, ún de los locales con más hestoria ya intrahestoria de Xixón cumple una montonera d'años, concretamente 25.

Pa celebralo escueyen un formatu que ye habitual nel chigre, entamar un conciertu con un grupu de los que faen que los veceros s'alcuerden de la nueche. Los escoyíos pa esti cumple so Felpeyu, que tienen al Trisquel na so evolución como grupu.

El Trisquel ye ún d'esos sitios que salten a la memoria si hai que recomendar a daquién un local con ambiente folki. Nos sos 25 años d'hestoria nin los más mayores s'alcuerden de cuántos conciertos y de cuántos estilos hebo en chigre, contando los entamaos con premeditación o aquellos que surdieron como sesiones espontánees gracies a la suerte, la predisposición de los músicos y a unos veceros con gana de sentir dalgo de música.

Ye más, El Trisquel tamién sirvió d'abellugu a grupos que, en determinaos momentos, nun teníen ónde metese pa ensayar, y aprovechaben la compresión, non siempre infinita, de los dueños del local. Precisamente una d'eses bandes que tienen plaza acutada na hestoria del bar ye Felpeyu, que, según cuenten les cróniques moyaes de cerveza, ensayaben na parte d'arriba del edificiu vieyu nel que s'alcontraba nos sos oríxenes El Trisquel.

25 años más tarde munches coses cambiaron, el mesmu Trisquel cambió de sitiu dende la cai Pedro Duro hasta'l so emplazamientu actual na cai Marqués de San Esteban, pero si dempués de tantu tiempu tovía yes quien a entamar folixes con música asturiana, esta vegada de la mano de Felpeyu, ye que dalgo tas faciendo bien.

La cita ye a partir de les 21:30, asegurando, d'un llau la barra y del otru l'escenariu, qu'esti vienres va haber tema de conversación nel Tris."