El Seminariu de Filoloxía de la Universidá d'Uviéu organiza les I Xornaes de Trabayu

"El departamentu de Filoloxía Española de la Universidá d'Uviéu, al traviés del so Seminariu de Filoloxía Asturiana va celebrar, los díes 6, 7, 8 y 9 d'ochobre, les I Xornaes de Trabayu ""Llabor en Tienda. Nueves Tendencies na Llingüística Asturiana"".

""Llabor en Tienda"" quier ser un alcuentru científicu y universitariu, onde los investigadores asoleyen énte la comunidá universitaria (profesores, estudiantes, otros investigadores) los proyeutos ya iniciatives nos qu'agora mesmo tán trabayando.

Anguaño, tanto dientro de la Universidá d'Uviéu como n'otres instituciones académiques d'España y del estranxeru, tán poniéndose en marcha proyeutos y plantegamientos d'investigación bramente novedosos alredor de la llingua asturiana. Estes iniciatives qu'abren caminos metodolóxicos y llinies d'estudiu venceyaos a les corrientes más avanzaes de la llingüística europea y mundial.

Nesti sen les xornaes pretenderíen llograr un sanu intercambiu de conocencies, afalando a los futuros investigadores del fechu llingüísticu asturianu a escazar per nueves llinies de trabayu. Les xornaes van desarrollase en sesiones de pela mañana y pela tarde, y nelles intervendrán unos venti especialistes en campos como la investigación esperimental fonética, la gramática xenerativa, la lexicografía y lexicoloxía, la dialectometría, la toponimia, el drechu llingüísticu comparáu, la llingüística de corpus, la llingüística variacional, la llingüística computacional, l'estudiu de la llingua medieval, y otres.
Dedicaránse tamién partaces esclusivos pal ámbitu lleonés y pal gallego-asturianu."