Buceadores voluntarios van retirar basura de los fondos marinos

El puertu de Cuideiru y el de Llanes son les zones nos que van intervenir buceadores voluntarios asturianos y lleoneses que participen esta fin de selmana na II Gran Limpieza Nacional de Fondos Marinos. Na primer edición celebrada nel 2015 retiráronse más de cuatro tonelaes de basura en tol Estáu.

La Red de Vigilantes Marinos entama esta iniciativa na que collabora Ecoembes y Trasmediterranea cola fin de retirar restos del fondu marinu, causantes de “la muerte de más d’un millón d’aves y cien mil tortugas y mamíferos al añu”. P’apangar esta situación, el domingu’l Grupo Ensidesa de Actividades Subacuáticas (Grupo GEAS) y Club León Sub van recoyer basura del fondu de los puertos de Cuideiru y de Llanes, de manera respeutiva.

Nel cai pixuetu l’actividá va principiar a les 10 hores, cola participación de más de sesenta persones, mientes que nel llaniscu los buzos van somorguiase al meudía. “Con esta iniciativa nun se pretende únicamente la retirada de residuos nocivos pa la natura; amás, búscase concienciar a los ciudadanos pa que les basures nun lleguen a la mar, sinón a los sos respeutivos contenedores de recoyida selectiva”, apunten los sos promotores.

Amás de nos dos puertos asturianos, van entamase recoyíes de basura n’otros dieciocho puntos de tol Estáu. Pa ello collaboren clubes de bucéu d’Euskadi, Murcia, Andalucía, Canarias, Ceuta y Melilla.