Federaciones de pescadores del Cantábricu aconcéyense en Xixón

"Federaciones de pescadores del Cantábricu van aconceyase en Xixón esti miércoles pa tratar el posible llevantamientu de la veda del bocarte y la convocatoria de movilizaciones pola xuba de los precios del gasoleu.

Al conceyu van asistir representantes de les federaciones d'Asturies, Galicia, Cantabria, Vizcaya y Guipúzcoa, según confirmó'l presidente de la entidá asturiana, Dimas García. L'asamblea foi convocada en previsión del próximu conceyu européu de xunu, nel que se va plantegar el llevantamientu de la veda nel casu de qu'asina lo aconseyen los estudios científicos.

García esplicó que les cofradíes del cantábricu tán dispuestes a ceder, nel casu de que se llevante la veda, a incrementar un 5 por cientu la cuota pa les embarcaciones franceses a cambiu de que dambes flotes nun coincidan nel caladeru. ""Nel hipotéticu casu de que se llevante la veda, tamos baraxando unes pesques d'ente siete y ocho tonelaes de la qu'a los barcos galos correspuénden-yos por llei un 10 por cientu: díbamos tar dispuestos a da-yos un cinco por cientu más si nosotros pudiéramos trabayar en primavera y ellos a partir de xunu"", espunxo García.

El presidente de la federación asturiana aseguró qu'ésta ye la época de mayor actividá pa la flota de baxura asturiana y aseguró que ""si se fai un paru tien que tar tola flota amarrada"". ""Nun vamos algamar nada si unos tán saliendo a la mar y otros paraos"", espresó García."