<I>Save the Children</I> denuncia abusos sexuales a neños y neñes per parte de miembros de la ONU

"La organización non gubernamental Save the Children denunció esta selmana que l'abusu sexual a menores per parte de trabayadores humanitarios y fuerces de paz ye daqué común y afirmó que los esfuerzos pa protexer a les víctimes nun son los apropiaos.

Un estudiu de la organización asegura que nes situaciones d'emerxencies hai niveles significativos d'abusu que nos más de los casos nun se denuncien y añadió que, nun siendo que nun se calle, los intentos pa eliminar la esplotación ""va siguir teniendo fallos"".

Les acusaciones d'abusu sexual per parte de fuerces de paz de Naciones Uníes y trabayadores humanitarios en tol mundu aumentaron nos últimos años y la ONU ta investigando denuncies escontra los sos soldaos en zones como Haití, Liberia, Costa de Marfil y la República Democrática del Congo (RDC).

Pese a que la ONU y dalgunes organizaciones non gubernamentales taben incrementando los sos esfuerzos pa tratar el problema, Save the Children calcula que tien d'establecese una ""guardia global"" esti añu pa valorar los ""intentos d'eliminación del abusu y apostar por respuestes efeutives"".

Save the Children basó'l so informe en delles visites efeutuaes l'añu pasáu a Haití, el sur de Sudán y Costa Marfil. Asina, creó 38 grupos de discusión con 250 neños y 90 adultos, siguíos d'entrevistes con dalgunos d'ellos ya investigaciones. L'estudiu descubrió un ampliu abanicu d'esplotación y abusu: neños intercambiando sexu por comida, sexu forzáu, abusu sexual verbal, prostitución infantil, pornografía infantil, esclavitú sexual y tráficu de neños. Los grupos de discusión identificaron a neños de sólo seis años como víctimes d'abusos, anque los más d'ellos teníen ente 14 y 15 años. De los 38 grupos, 20 identificaron a les fuerces de paz de la ONU como los posibles sospechosos, anque un total de 23 organizaciones humanitaries de paz y seguridá fueron asociaes con casos d'abusu sexual nos trés países.

""Toles les axencies humanitaries y de paz que trabayen en situaciones d'emerxencia, incluyida Save the Children, tienen d'aceptar el fechu de que son sensibles a esti problema y tratalu direutamente"", esplicó Jasmine Whitbread, direutora de la ONG en Reinu Uníu."