Doscientes persones van llucir el so traxe tradicional en Grau

La villa moscona acueye esti domingu'l Día’l Traxe’l País, col concursu 'Indumentaria'.

La organización estima que sían alredor de 200 persones les que lluzan los sos traxes tradicionales a lo llargo de tola mañana. D’éstes, 42 tán inscrites nel concursu 'Indumentaria', un certame que va empezar a les 11 hores na Plaza los Dolores cola convocatoria de los participantes énte’l xuráu. A les 12.30 hores va ser el desfile pal públicu na mesma plaza y, al terminar esti, va facese la entrega de los premios.

'Indumentaria' nun ye namás un concursu nin ta pensao pa ser una competición en sí, sinón pa ser una muestra de traxes de calidá y un estímulu pa los meyor vistíos. Asina, el Día’l Traxe’l País va axuntar en Grau a xente de toda Asturies y tamién visitantes de fuera. Calcúlase qu’asistan más de 150 persones fuera de concursu vistíes col paxellu asturianu, dalgunes con traxes completos de finales del sieglu XIX. Esti númberu, sumáu a les 42 persones inscrites nel concursu, garantiza que'l primer 'Indumentaria' sía un éxitu.

En cuantes al concursu propiamente dichu, va empezar a les 11 hores cola convocatoria de los participantes na Capiya los Dolores, onde van tener un momentu de convivencia col xuráu, formáu por Constantino Menéndez, Consuelu Riu, Fe Santoveña y Ana Villanueva, y una sesión de fotos al cargu del estudiu Ojos de Hojalata. Sicasí, hasta les 12.30 horas nun va empezar la fase abierta al públicu, que va consistir nel desfile, pela pasera instalada na Plaza los Dolores, de los 42 participantes. Estos van llucir traxes del oriente, centru y occidente; de marineros, de gala y de trabayu; dellos con camises de llinu antiguo y con pieces orixinales del sieglu XIX, como mantieḷḷas y capes.

Al final del desfile van sabese los ganadores dientro de les dos categoríes –home y muyer– que tien el concursu. Los primeros premios van llevar 200 euros y una lliga de llana esclusiva; los segundos, 150 euros, y los terceros, 100 euros. En total, 900 euros que patrocina Caja Rural d’Asturies. Estos gallardones van entregalos la conceyala de Festeyos del Conceyu de Grau, Elsa Suárez, y el director de la sucursal de Caja Rural d’Asturies na villa moscona, José Manuel Álvarez.

Tanto’l concursu como la xornada festiva en xeneral van tar animaos con música y baille. Asina, va contase cola participación de la pareya de gaita y tambor que formen Arsenio González y Manolo Díaz, el violinista Dolfu Fernández y l’acordión d’Octavio Trapiello. Amás, van collaborar con delles pieces Xosé Antón Fernández ‘Ambás’ y Ramsés Ilesies.

'Indumentaria' y el Día’l Traxe’l País son una iniciativa de la empresa de xestión cultural, comunicación y diseñu gráficu B. Alto, en collaboración cola Conceyalía de Festeyos del Conceyu de Grau y la Caja Rural d’Asturies.