La "Pita" de la Xunta reapaez na inaguración de la esposición de Pepa Osorio

"La ""Pita"" de la Xunta pola Defensa de la Llingua Asturiana reapaeció esti llunes na inaguración de la esposición de Pepa Osorio, a la qu'asistía'l presidente del Principáu d'Asturies, Vicente Álvarez Areces.

Areces, ""l'autoproclamáu enemigu de la oficialidá"" según el comunicáu de prensa que fizo llegar la Xunta, foi sorprendíu a les puertes de la Sala d'Esposiciones del Bancu Sabadell-Herrero n'Uviéu, por un grupu de militantes de l'asociación de defensa de los derechos llingüísticos. Como ye vezu, los miembros de la Xunta llevaben delles pancartes cola frase: ""Esti gobiernu marxina y reprime la llingua asturiana"".

Énte la sorpresa de los acompañantes del presidente, los militantes que diben cola ""pita"" entamaron a glayar: ""l'asturianu llingua oficial"", atopando la complicidá de delles de les persones que pasaben pela cai. Nesti sen, y d'alcuerdu col comunicáu, dalgunos curiosos averáronse a los manifestantes pa espresa-yos mensaxes del tipu: ""Facéis mui bien en lluchar por esto porque nun podemos dexar que muerra la nuestra llingua"" o ""meca, mira, ehí ta la famosa pita"".

D'otra manera, y dempués de que'l presidente del Principáu entrara na sala d'esposiciones, los axentes de la policía qu'acompañen a Álvarez Areces nos sos actos públicos procedieron a identificar a los manifestantes ""de males maneres"", según la Xunta.

Sicasí, y dende'l coleutivu, convídase a la ciudadanía d'Asturies a facer ""rescamplar el sentir mayoritariu en favor de la oficialidá del idioma nun momentu enforma crucial pa la situación llegal del asturianu"". Asina mesmo anuncien nueves movilizaciones sorrayando que ""mientres l'asturianu nun seya oficial el presidente nun va poder dormir a gustu"".

Pa ver el videu de l'aición"