L'ex alcalde d'Andratx, condenáu a cuatro años de prisión

"L'ex alcalde d'Andratx, Eugenio Hidalgo, xulgáu pola construcción d'una vivienda nuna zona d'interés paisaxísticu (ARIP) con una llicencia d'ampliación de nave agrícola foi condenáu esti llunes na Audiencia Provincial de Palma a un total de cuatro años de prisión, demientres que l'ex direutor xeneral d'Ordenación del Territoriu, Jaume Massot, foi sentenciáu a trés años y mediu de cárcele y l'ex-celador d'Obres del Conceyu, Jaume Gibert, a cuatro meses.

Esti foi'l fallu qu'emitió pasaes les 12.00 hores el ponente de la Estaya Segunda de l'Audiencia Provincial de Palma, Juan Catany, correspondiente a la sentencia de la primer pieza del Casu Andratx, tres el que, l'abogáu d'Hidalgo, Rafael Perera, anunció la so intención de recurrir énte'l Tribunal Supremu, camentando que los fechos que'l fallu condena ""nun s'axusten a la realidá"".

Concretamente, Hidalgo foi condenáu a un añu de prisión por inducir a un delitu de prevaricación alministrativa y a trés años como autor direutu d'un delitu escontra la ordenación del territoriu, considerándose nesti segundu la circunstancia agravante de valise del so cargu públicu. De la mesma manera, pierde'l derechu a ser emplegáu o cargu públicu na Alministración estatal, autonómica o local por un periodu d'ocho años pol primer delitu, y a les penes de tres años de cárcele y perda especial de capacitación pa la promoción urbanística por un tiempu de trés años.

Per otru llau, se-y condenó a pagar una multa de 20 meses, con 100 euros de cuota diaria pol delitu escontra la ordenación del territoriu, asina como a satisfacer dos sestes partes de los costos procesales, contando los de l'acusación particular personada. Per otra parte, la citada resolución conseña qu'Hidalgo va tener d'esbarrumbar la vivienda unifamiliar llevantada na finca de la so propiedá o pagar los gastos de la operación.

Pela so parte, Massot foi condenáu autor direutu d'un delitu de prevaricación y cooperador necesariu nun delitu escontra la ordenación del territoriu, polo que foi condenáu a dos años pol primeru y a ún y seis meses pol segundu, asina como a la perda especial del derechu al emplegu o cargu públicu na Alministración por un tiempu de diez años, a la multa de quince meses con 60 euros de cuota diaria y a pagar dos sestes partes de los costos procesales, contando los de l'acusación particular.

Amás, según la sentencia, l'ex celador d'Obres d'Andratx, Jaume Gibert, foi condenáu a cuatro meses de privación de llibertá por cooperación necesaria nun delitu escontra la ordenación del territoriu y anque de primeres el fiscal pidía seis meses, consideróse'l fechu de que collaborara cola Xusticia pa esclariar el casu."