L'Asamblea nepalí abole la monarquía

"Dos díes enantes de que l'Asamblea especial anuncie de mou oficial l'abolición de la monarquía que reinó nel país a lo llargo de 239 años, les autoridaes nepalís prohibieron cualesquier tipu de manifestación nos alredores del palaciu real y de la residencia personal del rei Gyanedra en Katmandú, por mieu a que se produzan incidentes.

El ministru pa la Paz y la Reconstrucción de Nepal, Ram Chandra Pudel, aseguró que les prohibiciones sólo van ser efeutives en llugares y places clave de Katmandú pa torgar asina""cualesquier tipu de provocación"". ""Cualquiera pue tratar d'aprovechase d'una situación tan delicada y crear problemes"", añadió.

Les autoridaes tamién prohibieron manifestaciones na residencia oficial del primer ministru y nel centru de convenciones onde s'aconceya l'Asamblea.

Espérase que los partidarios de los antiguos rebeldes maoístes, qu'encabecen la campaña escontra la monarquía, salgan a les cais de la capital nepalí pa celebrar la esperada decisión de l'Asamblea, prevista pal miércoles. ""Encamentamos a la xente a que salga a les cais pa celebrar el día de la república"", aseguró un altu dirixente maoísta, Dinanath Sharma. ""Ye un día históricu que va marcar el fin oficial de la monarquía feudal"", añadió.

L'Asamblea foi nomada n'abril col oxetivu de camudar Nepal nuna república y de pone-y el puntu a una guerra civil que dexó más de 13.000 muertos na última década. La mayoría hindú de Nepal permitió la monarquía a lo llargo de la historia porque'l rei yera tradicionalmente allabanciáu como una encarnación de Vishnu, el dios pa la proteición. Pero la so popularidá baxó dende que'l rei Gyanendra disolviera'l gobiernu nel 2006 ya impunxera un réxime absolutista, lo que provocó mayores protestes escontra'l monarca, obligándolu a entregar el poder a los partíos políticos un añu dempués.
Los maoístes, vencedores de les elecciones celebraes el pasáu mes d'abril, encamentaron al monarca a que se tresllade a la so residencia privada enantes de que l'Asamblea faiga oficial l'abolición de la monarquía p'ayudar a que la transición puea facese de manera pacífica."