Bemejo diz qu'estudiará la propuesta de los fiscales progresistes pa reformar la llei del albuertu

"El ministru de Xusticia, Mariano Fernández Bermejo, aseguró esti sábadu que'l Gobiernu ""va estudiar con procuru"" les conclusiones del XXIII Congresu de la Unión Progresista de Fiscales (UPF) no tocante a la normativa sobre l'albuertu y la eutanasia.

Enantes de pesllar el Congresu, Bermejo dixo que'l Gobiernu ""tien de tar atentu a toles persones que-y van dar conclusiones fundaes na realidá qu'ellos viven día a día"". Asina mesmo sorrayó que'l Gobiernu ""va sentir con munchu procuru les conclusiones d'esti congresu de la UPF"", porque ""siempre hai aportaciones mui interesantes"".

Asina almitió que yera ésti un conceyu de persones, nesti casu, fiscales, que ""día a día tán en contautu colos problemes reales d'esti país nel ámbitu de la xusticia, y, poro, saben muncho de los problemes que pue tar plantegando la llei del albuertu"".

Sicasí, el ministru recordó qu'una llei ""que funcionó bien a lo llargo munchu tiempu"", siempre suel ser puesta en ""cuestión"" nos procesos electorales, dalgo que'l titular de la cartera de Xusticia calificó de ""llamativo"".

No que cinca a la eutanasia, Fernández Bermejo manifestó que prefería referise a ella como ""derechu a vivir dignamente"", ""porque cuando falamos d'eutanasia tamos falando del derechu a vivir y d'una autonomía personal pa decidir hasta cuándo o en qué condiciones la vida ye digna"", añadió.

Bermejo valoró que nel congresu de la UPF se tratara esti asuntu porque se trata de profesionales que lo faen ""con conocimientu de causa"", a tener los fiscales competencies ""mui importantes"" en materia de defensa ""de les persones que nun puen defendese"", asina como ""una especial sensibilidá en rellación a esti tema""."