El Farho Xixón Baloncestu ganó n'Almería y pasa a la fase final pol ascensu

"El Farho Xixón Baloncestu ganó'l segundu partíu del ""play-off"" al Almería pol resultáu de 68 a 86 y con ello algamó la clasificación pa la final a cuatro que se va a celebrar el próximu fin de selmana en Cáceres.

El vienres entamen les semifinales y l'equipu xixonés va enfrentase al Illescas. El ganador xugará la final y namás el primer clasificáu de la fase va ascender a la LEB Oru.

L'equipu xixonés tuvo un plantegamientu claru dende l'entamu l'alcuentru y asina tuvo delantre nel marcador, namás nel primer cuartu foi un par de vegaes tres de los andaluces, llegándose a lo cabero'l periodu con seis puntos de ventaya, 22 a 28. Gran cuartu de Matt Kiefer que metió doce puntos y garró cuatro rebotes. Brandon Wolfram cargóse bien ceo con dos personales y tuvo que tar muncho minutos sentáu.

Foi nel segundu cuartu cuando'l Farho Xixón frayó l'alcuentru con un marcador de salida de 0 a 11. L'Almería tuvo cuatro minutos ensin encestar y dende l'entamu los asturianos garraron una ventaya de diecisiete puntos, 22 a 39. L'Almería nun se dio y con otru parcial de 10 a 4, el lletrónicu marcaba una diferencia d'once puntos, 32 a 43. Los asturianos alministraben bien la ventaya y nun baxaba de los diez puntos. Wolfram fizo la tercera falta personal y tuvo que volver al banquiellu. Amás les rotaciones a los xixoneses salíen-yos bien y el mal partíu de Wolfram yera cubiertu por Balmón y Pineda. La ventaya cuando finó'l periodu yera de catorce puntos, 35 a 39.

Tres el descansu volvió a intentalo l'Almería y Pearson, con seis puntos siguíos, amenorgó la diferencia a diez puntos, pero Kiefer y Pineda volvieron a poner los catorce de nueves, 41 a 55. El partíu yera cómodu pal Farho Xixón y namás a lo cabero'l cuartu un 7 a 0 local dexó'l marcador nun 52 a 60 cuando finó'l periodu.

Paecía que podía haber partíu y que l'Almería podía volver a metese dientro d'él, pero otru 0 a 7 de los asturianos, punxo la ventaya nun 52 a 67. Otra vegada lo intentaron los andaluces y volvieron a ponse a ocho, 61 a 69, pero Balmón, que taba faciendo un gran cuartu y y seis puntos siguíos, llevó al ventaya a doce puntos, 63 a 75. Dende esi momentu l'alcuentru taba venceyáu del llau xixonés y a lo cabero'l periodu la ventaya yera de dieciocho puntos, la mayor de tol partíu, con un 68 a 86 y con un Balmón que metió los seis últimos puntos de los xixoneses.

Per otru llau comentar que los problemes de cobru de la plantiya del Farho Xixón Baloncestu solucionáronse en parte al cobrar hai unos díes dos de los trés meses que se-yos debíen a los xugadores.

Los xugadores más destacaos nos asturianos foron Matt Kiefer (con dobles figures -23 puntos y 13 rebotes-,1 asistencia y 34 puntos de valoración, la mayor del partíu) y José María Balmón (18 puntos, 4 rebotes y 1 asistencia): Nos andaluces el más destacáu foi Tyray Pearson (tamién con dobles figures -19 puntos y 12 rebotes-, 1 asistencia y 30 puntos de valoración).

Ficha técnica:

Deportes Blanes-BS Hoteles Almería:
Javier Zaldive (4), Jesús Castro (11), Paco Rueda (19), David Mesa (13) y Tyray Pearson (19). Tamién xugaron: Adrian Tigert (2), Roberto Rueda (1),Anton Savitski (9), Pascual Sánchez, Christian Williams y Juan Carlos Liñán (8).

Farho Xixón Baloncestu:
David Jandl (6), Curtis Bobb (6), Adrián García (6), Matt Kiefer (23) y Brandon Wolfram (2). Tamién xugaron: Chus Pineda (5), José María Balmón (18), Sony Vázquez (10), Rubén Suárez (5) y Logi Gunnarsson (5).

Árbitrios:
Miguel Ángel Palenzuela y Conrado Martín.

Nengún de los dos equipos tuvo xugadores eliminaos por cinco faltes personales.

Partíu de la segunda xornada de los cuartos de final del ""Play-off"" de clasificación , xugáu nel Pabellón MoisésRuíz d'Almería.

Parciales per cuartos: 22-28, 13-21, 17-11 y 16-26."