Israel detién a 2.700 palestinos, ente ellos 255 menores, no que va d'añu

"Les autoridaes israelís detuvieron a 2.700 palestinos, los más d'ellos de Cisxordania, no que llevamos d'añu, según informó güei'l Ministeriu de Prisioneros del Gobiernu que caltién Hamas na Fraxa de Gaza dende hai cuasi un añu.

Nel informe, del que tien conocimientu l'axencia Maan, tamién se denuncia que 255 menores palestinos fueron arrestaos, asina como 14 muyeres. Ente los deteníos hai amás persones enfermes, cabezaleros políticos palestinos y d'organizaciones locales.

El distritu d'Hebron, en Cisxordania, y asitiáu a 30 quilómetros al sur de Xerusalén, ye la zona onde más detenciones se produxeron esti añu, yá que'l númberu xube a unos 700. Los restantes 600 palestinos arrestaos son de la Franxa de Gaza.
El direutor del departamentu d'información del Ministeriu de Prisioneros, Riyad al Ashqar, asegura que 28 cárceles y centros de detención israelís tán enllenos de prisioneros palestinos. El total de palestinos en centros israelís perpasa los 11.700.

Amás, l'informe afirma qu'Israel ta incrementando l'usu de la detención alministrativa, baxo la que los arrestaos puen ser encarcelaos ensin cargos o ensin xuiciu previu. Ye'l casu de Mahmoud al Masalma, de la población de Beit Awwa, en Cisxordania, que tien orde d'arrestu anovada 19 vegaes poles autoridaes israelís ensin ser acusáu formalmente. Los tribunales hebreos emitieron más de 1.300 órdenes de detención alministratives esti añu, según l'informe, qu'asegura que'l númberu de palestinos baxo esti arrestu alministrativu supera los 1.100."