Cúmplense 200 años del llevantamientu de la Xunta Xeneral

"Asturies celebra güei los 200 años d'una de les sos feches históriques de mayor trescendencia, la declaración de soberanía de la Xunta Xeneral del Principáu el 25 de mayu de 1808, en rempuesta a la invasión de les tropes franceses. Naquella fecha, les clases populares forzaron a la máxima institución política asturiana a facer una declaración de soberanía y a declarar la guerra contra la Francia napoleónica. Asturies llevantábase contra la primer potencia mundial nun actu d'afirmación que l'historiador Faustino Zapico califica de ""revolucionariu y qu'esplica nesta tribuna p'Asturies.com y nel so llibru ""La revolución de 1808. L'aniciu de la historia contemporánea d'Asturies"" que se presentó esta selmana y nel qu'esplica'l papel de los principales protagonistes del llevantamientu, qu'Álvaro Florez Estrada caltuvo énte la rocea de bien de los compañeros diputaos.

Pela parte de les instituciones asturianes, estos 200 años celebráronse con un alcuentru institucional conmemorativu na Xunta Xeneral, heriede democrática del organismu del antiguu réxime. Los conceyos asturianos, representaos polos sos alcaldes, diputaos y ex diputaos, el Presidente del Principáu, conseyeros, el Delegáu del Gobiernu y otres autoridaes, participaron nel actu.

D'otra manera, dende los años 70, parte del asturianismu políticu y cultural reivindica'l 25 de mayu como fecha más afayadiza pa la celebración del día d'Asturies, contra la celebración del 8 de setiembre, centrada na fiesta relixosa. Asturies.com quier xorrascar la opinión de los sos llectores al respective d'esta cuestión y convídate a participar nesti conceyu abiertu."