Les llingües rexonales tarán presentes na Constitución francesa

"Los diputaos de l'Asamblea Nacional francesa aprobaron esti xueves práuticamente per unanimidá una enmienda sorpresa al proyeutu de llei de reforma de les instituciones, que s'alderica estos díes na Cámara gala, qu'abre la puerta per primer vez a la inclusión de les llingües rexonales na Constitución francesa.

El votu positivu de la enmienda, qu'establez que les llingües rexonales pertenecen al patrimoniu francés, foi acoyíu como una gran victoria polos parlamentarios bretones, corsos o alsacianos, que reivindiquen dende hai tiempu la reconocencia de llingües que falen dellos millones de persones en Francia.

Propuesta pol diputáu de la UMP Jean-Luc Warsmann, el testu completa l'artículu primeru de la Constitución sobre la organización descentralizada de la República Francesa. En nome del Gobiernu, la ministra de Xusticia, Rachida Dati, dixo ser ""favorable dafechu"" a la enmienda.

Esti tipu de disposición venía siendo reclamada dende hai tiempu por munchos parlamentarios de toles tendencies polítiques. De fechu, el conxuntu de los grupos de l'Asamblea - UMP, Nuevu Centru, Partíu Socialista, Partíu Comunista Francés, Verdes y MoDem - presentaren enmiendes asemeyaes a la que salió güei, que fueron refugaes pola comisión llexislativa la selmana pasada, por eso sorprendió que la del conservador Warsmann fuera aprobada.

Curiosamente, el pasáu 7 de mayu l'Asamblea Nacional francesa celebró per primer vez un alderique sobre la conveniencia de dar un estatus específicu a les llingües rexonales.

Los defensores de les mesmes piden una llei específica pa promover el so usu. Pidíase en concreto, revisar l'artículu 2 de la Constitución francesa qu'establez que ""la llingua de la República francesa ye'l francés""."