Unes 200 persones piden la dimisión de Rajoy énte la sede del PP

"Sobre dos centenares de persones tán concentraes dende esti mediudía énte la sede nacional del PP en Madrid, na madrilana cai Xénova, n'apoyu a la presidenta del PP vascu, María San Gil y cantando llemes del tipu: ""Mariano Rajoy dimite hoy"".

Los concentraos respuenden a la convocatoria fecha esti xueves pente medies de mensaxes de testu de teléfonu móvil p'apoyar a la dirixente vasca y a José Antonio Ortega Lara, que tamién anunció la so salida del PP. De siguío, foi convocada pol mesmu sistema de SMS una contramanifestación en defensa de Rajoy, pero a esta hora les persones aconceyaes na cai respuenden al primer llamáu.

Les movilizaciones coinciden cola celebración na sede d'un alcuentru ente Mariano Rajoy y alcaldes del PP de capitales de provincia. Ún de los momentos más tensos vivióse cola llegada del alcalde de Madrid, Alberto Ruiz Gallardón, al que dalgunos de los manifestantes llegaron a dici-y ""traidor"", ""asesín"" y ""cobarde"".

Delles pancartes fueron desplegaes polos concentraos con conseñes de respaldu a María San Gil, semeyes de la dirixente vasca y del ex funcionariu de prisiones secuestráu por ETA a lo llargo de 532 díes. ""María eres grande, Rajoy, lenta agonía del PP"", diz ún de los mensaxes. Otra de les conseñes más presentes na concentración de ye la reclamación de primaries pa la elección del próximu candidatu a la presidencia del Gobiernu pol PP y de ""democracia interna"".

Amás, los axuntaos ellí tán recoyendo firmes n'apoyu a María San Gil, cola intención de presentales a la direición del partíu pa que tenga en cuenta'l so criteriu.

Los concentraos esti mediudía énte la sede de la cai Génova son sobre manera persones mayores y un pequeñu grupu de mozos que comentaron qu'esperaben una participación mayor de manifestantes. Les persones consultaes coincidieron en denunciar que Mariano Rajoy ta ""traicionando"" el so votu. ""Piensa que somos borregos y que nun tenemos espíritu críticu. Col mio votu nun va volver contar nunca más"", afirmó un mozu estudiante que llevaba una bandera d'España."