De Lorenzo abandona la "política de partíu"

"L'alcalde d'Uviéu, Gabino de Lorenzo (PP), anunció esti xueves que'l próximu 31 de mayu va xubilase y abandonar la ""política de partíu"" pa siguir siendo alcalde y centrase na xestión municipal.

De Lorenzo fizo estes declaraciones na so intervención nel actu de la receición a los funcionarios xubilaos nel 2008 con motivu de la fiesta de Santa Rita, según confirmaron fontes municipales. L'alcalde esplicó que se xubila a finales d'esti mes porque lleva 35 años cotizaos. Sicasí, eso nun quier dicir que dexe de ser alcalde, sinón que va ser la Seguridá Social y non el Conceyu quien-y pague'l sueldu, recibiendo d'ésti namás que les dietes.

De Lorenzo recordó'l so reciente pasu pela política nacional, cuando foi cabezaleru del PP nes xenerales por Asturies y dempués renunció al acta de diputáu. L'alcalde señaló que yá nun diba implicase nin na política nacional, nin na rexonal nin la del so partíu, pa dedicase dafechamente a los intereses de los uvieinos.

""Pasé aína pela política nacional y acabó dafechu; pa mi tamién finó la política rexonal y la política de partíu, voi dedicame a la xestión municipal"", señaló'l rexidor uvieín.

Gabino de Lorenzo foi elixíu conceyal del Conceyu d'Uviéu en 1987 como cabezaleru de llista del PP, grupu mayoritariu de la oposición nestos momentos. Dende entós presidió la Xunta LLocal del PP n'Uviéu. Cuatro años más tarde, en 1991, algamó l'alcaldía d'Uviéu, cargu que repite con mayoría absoluta nes elecciones de 1995, 1999 y 2003. Dende 1995, ye miembru de la Xunta Direutiva del Partíu Popular y tamién forma parte del Comité Executivu Rexonal y de la Xunta Direutiva Rexonal n'Asturies."