Les playes del Cantábricu puen perder una franxa de 15 o 20 metros d'anchu nel 2050 pol cambiu climáticu

"El catedráticu asturianu de la Universidá de Cantabria, Íñigo Losada, señaló nel día d'ayeri en Xixón, que por cada centímetru d'aumentu del nivel de la mar piérdese un metru de sablera. Ye más, indicó que nel casu del Cantábricu, la reculada prevista de les playes pal 2050 ye d'una franxa d'ente 15 o 20 metros d'anchu, lo que diba afeutar sobre manera a les playes urbanes, que nun tienen pa ónde crecer.

Según Losada, que fizo estes declaraciones na rueda de prensa con motivu del Congresu Mundial ""Los efeutos del cambiu climáticu nos océanos"" que se celebra nel recintu ferial de Xixón, la solución diba ser echar p'atrás la playa, anque nel casu de Xixón esto nun ye posible pola mor de les construcciones.

Per un llau, indicó que la rexeneración pue facese con arena más gorda, como la de la playa Poniente, pero repercutiría nes condiciones de disfrute de los bañistes, al non ser la mesma arena. Pola contra si s'usa arena más natural, diba ser necesario facer obres y sacala de dalgún sitiu, lo que diba xenerar un impautu nesa zona. Por esti motivu, apuntó que va qu'estudiar qué se quier facer y si se ta dispuestu a pagar más. Referíu a San Lorenzo señaló tamién que'l nuevu dique del puertu va producir un xiru de la playa hacia la zona de la ilesia de San Pedro y va amenorgar ""un pocu"" l'efeutu de les foles. Na so opinión, el xiru de la playa ye beneficiosu, ya que na zona del Piles ""hai arena de sobra"". Sicasí, recordó que les condiciones del nivel del mar y de les foles nun va ser les mesmes nel 2050.

Pa Losada, ye importante que s'introduzan estudios de los posibles impautos del cambiu climáticu nos proyeutos d'infraestructures, como se fai ya en dalgunes ocasiones, especialmente nos proyeutos que reciben ayuda internacional del Bancu Mundial y otres axencies de cooperación. Respeuto a los efeutos del cambiu climáticu n'España, el catedráticu, d'acordies a un estudiu encargáu pol Gobiernu nel qu'él participó hai tes años, apuntó que toles zones costeres más baxes, como la Manga'l Mar Menor, la zona d'Isla Cristina y otres d'Huelva o la de Cádiz, va ser ""les más sensibles"" pol aumentu del nivel de la mar. Nel casu del Cantábricu, les árees más afeutaes van ser de toles ríes, Villaviciosa, Eo o Santoña, por exemplu, menos les Ríes Baxes gallegues.

N'otres zones, como'l delta del Ebru, hai capacidá pa echar p'atrás anque se perderíen dalgunes zones de cultivu d'arroz, dalgo que nun se pue facer na Manga. El catedráticu apuntó la posibilidá de qu'haya cultivos que cambien n'España. Nesti sen, indicó qu'hai otros países que tán más avanzaos nos estudios sobre l'impautu del cambiu climáticu nos cultivos, como ye'l casu de Cuba, onde se ta perdiendo'l de la pataca.

No tocante al nivel del mar, n'Asturies espérase un aumentu de 12,5 centímetros pal 2050. L'incrementu tamién va provocar en xeneral más problemes d'inundaciones, que van ser más frecuentes. Otru efeutu ye l'aumentu del tamañu de les foles, que ya se ta apreciando, sobre tou na zona del Cantábricu y tamién en Canaries, mientres qu'hai un descensu nel Atlánticu Sur, en Cádiz. De la mesma manera, mayores foles van llevar tamién a la erosión y desapaición de playes. Amás, según él, non sólo hai mayores foles, sinón que, les mesmes cambien de direición y faen xirar les playes. Por eso último, les zones que ya tán siendo afeutaes tán nel Norte de Xerona, na Costra Brava.

Losada sorrayó qu'esti estudiu, en llugar de trabayar con escenarios que nun ofrecen probabilidaes de que pase, fízose tamién con información basada en datos históricos ""p'acortar la inseguridá"". Ye más, auguró que la situación real que s'vien va ser ""peor"" de lo previsto, ya que los datos utilizaos son anteriores al aumentu de les emisiones de CO2 de los últimos años. De la mesma manera, destacó la repercusión socioeconómica que pue tener el cambiu climáticu.

El catedráticu adelantó amás que van realizar un estudiu sobre l'impautu del cambiu climáticu en San Sebastián y Santander. Respeuto al primer llugar, citó los problemes de deterioru que sufre ya'l conocíu edificiu de La Perla, na playa de la Concha, debío al nivel del mar, les foles y los temporales. ""Esti añu hubo tres"", dixo sobre estos últimos. Tamién en San Sebastián incluyóse nel proyeutu de construcción d'una pasarela nel cantil un estudiu de los posibles efeutos del cambiu."