Saakashvili gana les elecciones parlamentaries en Xeorxa

"El presidente de Xeorxa, Mijail Saakashvili, del Movimientu Nacional Uníu (MNU), llidera les votaciones col 60,92 por cientu, según los primeros datos oficiales de les elecciones parlamentaries que se celebraron esti miércoles nel país. Col 13 por cientu de los votos contaos en segundu llugar la coalición de la oposición, con 14,61 por cientu de votos al so favor.
El resultáu de les elecciones publicáu pola Comisión Electoral Central (CEC), pon en tercer llugar al Movimientu Democráticu Cristianu, col 8,29 por cientu y el Partíu Llaboral, con 6,98 por cientu de los votos contaos. La oposición, qu'aseguró poco dempués del zarru de los colexos electorales que ganara la votación, afirmó que fueron víctimes d'un ""fraude electoral masivu"" nel país caucásicu.

Los países d'occidente consideren les elecciones como una prueba de fueu pal presidente electu y el so compromisu cola democracia, mientres que Saakashvili sigue col so oxetivu d'ingresar na alianza militar de la OTAN, movimientu al que s'opón el país vecín de Rusia. ""Hasta yo quedo ablucáu col apoyu qu'algamamos nes elecciones parlamentaries"", comentó'l presidente nun discursu a la nación.

El responsable xeorxanu dixo que'l so partíu pue algamar la mayoría constitucional, de dos tercios de los 150 asientos del Parlamentu. ""Lo que trunfó ayeri foi la voluntá del pueblu de Xeorxa"", dixo Saakashvili. ""Naide pue torgar que nun se cumpla la voluntá de los ciudadanos"", añadió demientres el so discursu. El cabezaleru de la coalición de la oposición, Leva Gachechiladze, yá fizo un llamáu a más de 100.000 persones pa que salgan a les cais a vindicar la victoria, anque sólo unos 4.000 siguidores llegaron na capital pa protestar polos resultaos oficiales. ""Foi un fraude dafechu"". ""Enxamas enantes viéramos dalgo paecíu nes elecciones presidenciales del país"", dixo ún de los cabezaleros de la coalición opositora, Irakly Iashvili. ""A pesar de les violaciones, la oposición ganó"". Saakashvili cuenta más col apoyu d'occidente na so llucha escontra Rusia pol apoyu que'l país ta dándo-y a les dos rexones xeorxanes separatistes d'Osetia del sur y Abjasia."