La "Hermandá de Defensores" diz que la retirada de símbolos franquistes ye un "atentáu escontra la historia"

"El presidente de la Hermandá de Defensores d'Uviéu, Fermín Alonso Sádaba, dixo que yera un ""atentáu escontra la historia d'Uviéu"" la retirada del medayón de Franco nel Monumentu de la Paz de la Plaza d'España, la estatua del teniente coronel Teijerio na Plaza de la Lliberación y los monolitos que recuerden la defensa d'Uviéu na plaza de la Xesta y el nome de 12 cais.

Alonso Sádaba, en declaraciones a la prensa, criticó la decisión qu'adoptó esta selmana la comisión de la Memoria Histórica, creada pol alcalde d'Uviéu pa revisar la simboloxía franquista de la ciudá. Según el presidente de la Hermandá, ""dalgunos empéñense en querer quitar el nome de persones que dieron la so vida por querer salvar a la ciudá del comunismu internacional"".

Sádaba señaló que los más de los que formaben el ""Exércitu Roxu"" lluchaba escontra la República, a la escontra d'España y glayando ""Puxa la URSS"". ""Yéremos 3.000 combatientes escontra 12.000 milicianos que queríen estruyir la ciudá"", apuntó y añadió que ""los qu'agora tienen cais na capital d'Asturies fueron héroes de la defensa d'Uviéu"".

El presidente de la Hermandá de Defensores d'Uviéu resaltó que la defensa de la ciudá foi un episodiu ""épicu"" na defensa de la nación española y un exemplu en toles academies militares españoles. Sádaba defendió tamién a los milicianos del ""Exércitu Roxu"" ""que llucharon poles sos idees"" pero criticó a aquellos que ""los abandonaron"" y colaron pal estranxeru ""a vivir del cuentu"". ""Éstos son los qu'agora quieren cambiar la historia"".

Respeuto a la Memoria Histórica y los monumentos, Fermín Alonso señaló que nunca la Hermandá se punxo a la escontra de la colocación de la estatua d'Aida Lafuente nel Parque de San Pedro de los Arcos. Anque esplicó que les persones que s'aconceyen alredor d'ella tolos años s'equivoquen cuando lleven la bandera tricolor ""porque ella lluchaba escontra la República"".

Poro, el responsable de la Hermandá de Defensores d'Uviéu manifestó la intención de recurrir la decisión de la comisión de la Memoria Histórica y apostó por llevar a cabu un referendu ente los ciudadanos d'Uviéu pa quitar el nome de les cais."