Marta Mori participa en Bimenes nun alcuentru con llectores

L'eventu, que forma parte de los Talleres de Llectura n'Asturianu 'Comarca de la Sidra', céntrase na obra 'Histories familiares'.

Esti alcuentru entámalu'l Serviciu de Normalización Llingüística de la 'Comarca de la Sidra' en collaboración col Conceyu de Bimenes y l'asociación Ente Muyeres, con aniciu previstu pa les 17,30 hores nel Centru Social de Martimporra. 'Histories familiares' trátase d'una colleición de rellatos dividíos en dos partes, a caballu ente la ficción y lo autobiográficu, qu'indaga na historia de la familia de Marta Mori y la so infancia.

La escritora xixonesa ye doctora en Filoloxía Hispánica y tien espublizaos, amás d'una cantidá grande d'artículos d'historia y crítica lliteraria, poemarios como 'Pórticu', 'El tiempu de la espera', 'La mio voz' o 'L'alcordanza', colos que tien algamaos premios como'l Teodoro Cuesta y el Xuan María Acebal.