Greenpeace asalta la sede d'una empresa d'esplosivos en Madrid

"Activistes de la organización ecoloxista Greenpeace desplegaron una pancarta xigante na fachada de la compañía Esplosivos Alaveses (Expal) en Madrid ya introduxeron nel edificiu prótesis de persones ensin miembros y siluetes de cartón representando a les víctimes, nuna aición pa manifestar el so refugu a les ""bombes de racimu"".

Los participantes reclamaron aconceyase colos responsables de la empresa pa espresa-yos la so posición con respeuto a esti tipu d'arma y face-yos entrega de la copia d'una prótesis y d'un videu con un testimoniu recoyíu en Camboya nel qu'una víctima d'esti armamentu se dirixe direutamente a ellos.

Seis escaladores desplegaron la pancarta cola imaxe d'un neñu mutiláu poles bombes de racimu, que simboliza ""toles víctimes inocentes qu'estes bombes causen per tol mundu"", según informó güei a la organización nun comunicáu. Nel cartel lléese'l mensaxe. Expal fabrica bombes de racimu que mutilen.

Per otru llau, otru grupu d'activistes enllenaron l'estragal del edificiu con prótesis y siluetes de persones afeutaes por esti armamentu. La prótesis, que va entregase tamién nel Ministeriu de Defensa y nel d'Esteriores, representa a toles persones que resultaron mutilaes, firíes o muertes como consecuencia d'una bomba de racimu. Amás, Greenpeace va facer entrega d'un videu onde una víctima de Camboya reclama la prohibición d'este armes.

""Gracies por escuchame. Espero que dexen d'usar y fabricar bombes de racimu. Quiero enseñavos personalmente'l resultáu de los vuesos productos. Poro, prestaríame ofrecevos esto como símbolu de les vueses aiciones, como símbolu de lo que producís y como símbolu del efeutu que tenéis nel mundu. Gracies"", diz la víctima. Trátase del testimoniu de Sot, un mozu camboyanu de 18 años que tuvo un acccidente con esplosivos ensin detonar nel añu 2004."