Javier Fernández ye’l favoritu de los críticos con Sánchez pa dirixir la posible xestora del PSOE

La dimisión el miércoles de 17 miembros de la Executiva del PSOE dexa al partíu nun situación d’incertidume. Los críticos con Pedro Sánchez defenden que lleva a la destitución del secretariu xeneral y a la creación d’una xestora que taría encabezada por Javier Fernández, mentes que l’otru sector afirma que los estatutos nun contemplen esi posible escenariu.

El secretariu d’Organización y Aición Eleutoral, César Luena, defendió esta posición ayeri en rueda de prensa, lleendo l’artículu 68 de la Normativa Reguladora del partíu, que namái da valir a la Comisión Executiva Federal pa disolver la Executiva o cualquier otru organismu. Mentes, los críticos con Sánchez faense ecu del 36 de los Estatutos Federales, que pasa la pelota al Comité de Garantíes y que, anque nun cita la creación d’una xestora, sí que conduz a ella.

Nesti puntu apaez el secretariu xeneral de la FSA, Javier Fernández, favoritu en toles quinieles pa encabezar esta xestora que dirixiría’l partíu de forma momentánea nun momentu clave pa decidir la gobernabilidá del Estáu. El presidente del país tien un bon cartelu dientro del partíu, sobre manera ente los barones, y paez tener ventaya nesti supuestu frente Verónica Pérez, la otra alternativa que se baraxa.

Ensin poder entrar en Ferraz

Precisamente la presidenta del Comité Federal foi la protagonista d’esta mañana al nun poder acceder a la sede socialista en Ferraz, onde acudió pa convocar de manera formal el Comité de Garantíes. Tres dos hores d’espera nel antepar, Pérez abandonó’l llugar “triste” al nun recibir respuesta nenguna y amosó la so esperanza en que la presidenta de dichu comité, Isabel Celáa, decida conovocalu darréu.

Les asturianes de la Executiva, siguen

Adriana Lastra y María Luisa Carcedo son les representantes asturianes na Executiva Federal y dos de les 18 persones que siguen nel cargu, amosando asina’l so sofitu a Sánchez. Lastra amosó ayeri la so tristeza en redes sociales pola situación y defendió que la ruta correuta ye la convocatoria de Comité Federal el sábadu pa qu’ésti convoque’l Congresu, tal como propunxo’l secretariu xeneral el llunes.

Día triste, muy triste, porque es el peor día de mi partido. Pero será la militancia la q decida el futuro. El PSOE es de su militancia

— Adriana Lastra (@Adrilastra) 28 de septiembre de 2016

Buenos días. A las 10.30 Comisión Ejecutiva del @PSOE para, como dictan los estatutos, convocar comité federal q convoque Congreso.

— Adriana Lastra (@Adrilastra) 29 de septiembre de 2016