Carlos Rubiera abandona'l Partíu Asturianista

"L'históricu asturianista y músicu del ""nuevu canciu astur"", Carlos Rubiera, acaba facer pública la decisión d'abandonar el Partíu Asturianista, formación de la que yera militante dende la so fundación.

Nun artículu d'opinión, espublizáu esti miércoles na edición en papel del diariu La Nueva España, Rubiera fai un repás pel percorríu históricu del partíu dende los sos entamos ""ensin medios económicos nin esperiencia política"", hasta los resultaos de les elecciones del pasáu añu nes que xulga ""avergoñante'l proceder"" de la executiva del partíu, a la que compara con una llargatesa que, cuando ve peligrar la so vida ""suelta'l rau"".

Rubiera valora asina mesmo los llogros del partíu del que se daba de baxa hai unos díes, cola puesta en marcha de la Llei d'Usu y Promoción del Asturianu o la presencia na Xunta Xeneral del primer diputáu asturianista. Sicasí, reconoz que'l so trabayu nel partíu amenorgó de magar 1999, sobre manera pola so intención de dedicase más fondamente a la música y el remocique de la so casa de Caldones, en Xixón.

Pa finar declárase mui molestu cola actitú de la direutiva y el cabezaleru del partíu, a los qu'acusa de ""nun dar la cara"" dempués del resultáu de les elecciones, nes que'l PAS se presentara en coalición cola URAS, ""faciendo suyu'l discursu d'un candidatu alloriáu pola derrota eleutoral"" fina."