Zapatero refuga'l plan d'Ibarretxe

"El presidente del Gobiernu, José Luis Rodríguez Zapatero, insistió esti martes en que nun apoyará la propuesta de pautu del lehendakari Juan José Ibarretxe, y aseguró que la so posición sobre los socesivos planes d'ésti siempre foi la mesma enantes, demientres y dempués del procesu de paz cola banda terrorista ETA.

Na rueda prensa posterior al alcuentru ente dambos, el xefe del Executivu nun quixo referise a les negociaciones de Loyola d'ochobre del 2006 ente PSE, PNV y Batasuna, nes que se basa la propuesta d'Ibarretxe, pese a que'l lehendakari sorrayó que nun taba d'alcuerdu con que'l Gobiernu nun tuviera dispuestu a negociar con él lo que, según dixo, sí tuvo dispuestu a negociar con ETA nesi momentu.

Zapatero retrucó-y que la ""comparanza ye un poco absurda"", opinando que ""los principios y la posición política que caltuvi son los mesmos del procesu de paz, demientres el procesu de paz, güei y va ser la mesma mañana o cuando toque"", añadió. Amás, recalcó que si se llegara a la situación actual, ""con aiciones violentes, con atentaos y con asesinatos d'ETA nun sería precisamente porque'l gobiernu d'España cedió nin acordó"" cola banda. ""Pido un poco de sensatez cuando se faen dalgunes reflexones o manifestaciones más allá de que puea tener un análisis, prefiero non espresame públicamente"", sorrayó.

Nun entró tampoco nos puntos concretos de la propuesta d'Ibarretxe, pero sí respondió al ser entrugáu qu'en tola conversación nun se faló de Navarra. Zapatero insistió en que la so posición nun cambió y que nun va negociar con Ibarretxe una propuesta ""que nun se sabe a ónde va"", que nun tien el consensu de los ciudadanos vascos y que nun respeta'l marcu de la Constitución y l'Estatutu de Gernika. ""Cada vez vien con una cosa distinta"", dixo y tachó de ""aventura y viaxe a nenguna parte"" la propuesta del 'lehendakari'. Falala, dixo, ye ""innecesario"" y nun ye ""conveniente"" porque divide y porque engaña. Asina, encamentó a Ibarretxe a falar de ""coses concretes"" y mostróse dispuestu a falar de trespasos de competencies y de reformes del Estatutu de Gernika ""polos cauces apropiaos"", pero recordó que'l llamáu plan Ibarretxe, al qu'al so xuiciu esta propuesta ""recuerda"" foi refugáu pol Congresu de los Diputaos.

El lehendakari, Juan José Ibarretxe, aseguró que'l presidente del Gobiernu, José Luis Rodríguez Zapatero, recibiólu en La Moncloa con una actitú ""a la defensiva"" y que ""sólo tien un proyeutu pa Euskadi nestos momentos, que ye celebrar elecciones"", al tiempu que-y reprochó que refugue agora lo mesmo que'l PSE tuvo dispuestu a firmar con Batasuna nes negociaciones demientres la tregua d'ETA nel 2006. ""A pesar de les circunstancies en que se desarrolló'l conceyu sigo pensando que tovía tamos a tiempu"", afirmó Ibarretxe en rueda prensa tres dos hores y media de conceyu nel que presentó a Zapatero la so propuesta que, según esplicó, básase ""ensin cambiar nin les comes"" nel testu que'l PSE, el PNV y Batasuna negociaron n'ochobre del 2006 en Loyola. ""Nun pierdo la esperanza, tamos tovía a tiempu"", siguió'l xefe del Gobiernu vascu. ""Ye un pautu democráticu que yo nun doi por peslláu porque me paez imposible que lo qu'ayeri'l partíu socialista consideraba llexítimu, constitucional y adautable, güei, seya illegal, inconstitucional, una aventura, una ocurrencia"", añadió. Amás, aseguró que ta dispuestu a ser flexible sobre los puntos de la so propuesta si dalgún d'ellos ye ""insuperable"" pal xefe del executivu.

El lehendakari insistió en que propunxo a Zapatero ""abrir la puerta xuntos"" pa ""buscar alcuerdos políticos"" y elevar esi acuerdu al Parlamentu vascu y, posteriormente, llevalu a una consulta de la sociedá vasca nel 2010, pero nun precisó qué va facer el próximu 26 de xunu nel plenu que convocó na Cámara vasca si nun llogra l'alcuerdu que persigue col Gobiernu central. Ibarretxe destacó de la mesma manera que nel so conceyu dexó claro a Zapatero que ""Euskadi nun ye una parte subordinada d'España"" y que les Cortes Xenerales nun puen imponer un 'non' a lo qu'aprueba'l Parlamentu Vascu."