Núñez Feijóo revalida la so mayoría absoluta

L'EAJ-PNV ameyora resultaos n'Euskadi.

El popular Alberto Núñez Feijóo algamó la so tercer mayoría absoluta en Galicia ameyorando inclusive resultaos con respeuto a hai cuatro años, onde tamién sumó 41 escaños: d'un 45,80 por cientu del total al 47,53 por cientu. L'alternativa d'izquierdes, poro, nun consiguió l'oxetivu de consiguir un cambiu de color na Xunta, destacando l'aguante del BNG y la perda de diputaos del PSOE.

Los nacionalistes, a los que l'encuestra preleutoral del CIS daba-yos una perda de 5 parllamentarios, finalmente queda con ún menos pa sumar un total de 6 (8,46 por cientu del total por un 10,11 por cientu nel 2012). Mentes, los socialistes algamen 14 (17,88 por cientu) polos 18 (20,61 por cientu) d'hai cuatro años.

En Marea, la cara nueva de les eleiciones gallegues xunto con Ciudadanos, irrumpió con 14 diputaos, superando al PSOE en porcentaxe de votu al llegar al 19,07 por cientu. Los españolistes, mentes, sumen un 3,38 por cientu, pero nun tienen representación nel Parllamentu.

Otra manera, la participación foi del 63,75 por cientu, nueve puntos mayor que nel 2012 (54,91 por cientu).

Urkullu repetirá como lehendakari

Iñigo Urkullu tará cuatro años más como presidente d'Euskadi con un gobiernu en minoría tres ganar ayeri les eleiciones vasques, tamién con un ameyoramientu de resultaos. L'EAJ-PNV sumó 29 escaños, dos más que nel 2012, con un 37,65 por cientu del total de de votos (34,61 por cientu).

EH Bildu nun se resintió tanto como s'esperaba de la primer participación d'Ekarrekin Podemos nunes eleiciones vasques y sigue siendo la segunda fuercia con 17 escaños (21 nel 2012) y un 21,23 por cientu de los votos (25). Mientres, la formación morada suma 11 parllamentarios (14,83 por cientu) y supera al PSOE, el gran derrotáu ayeri n'Euskadi al perder la metá de la so representación al pasar de 16 (19,14 por cientu) a 9 (11,94 por cientu), mesmu resultáu que'l PP (10,16 por cientu), que suma un escañu menos (11,75 por cientu).

Pela so parte, Ciudadanos (2,02 por cientu) nun algamó'l so oxetivu de quedar col diputáu d'UPyD. La participación n'Euskadi foi del 62,26 por cientu, puntu y mediu menor que nel 2012 (63,96 por cientu).

Pedro Sánchez pierde creitu

Anque los dos resultaos eleutorales nun pueden estrapolase a nivel estatal, con un bloquéu en Madrid pa la formación de Gobiernu que too paez indicar que va finar nunes terceres eleiciones, lo cierto ye que'l candidatu a la presidencia'l que sal mal paráu ye'l socialista Pedro Sánchez, con una perda importante de representación nos dos territorios. El PP, mentes, gana en Galicia de manera contundente y algama'l resultáu esperable n'Euskadi, lo que sirve pa reforciar a Mariano Rajoy al empar, sicasí, de que'l resultáu afita a Núñez Feijóo como'l meyor colocáu pa relevar al presidente estatal en funciones como líder popular.