El Sporting y l'Uviéu abren la temporada de ‘Alderiques d’Asturies’

El sábadu a les 19 hores en MuyMuyTV con un alderique con aficionaos de dambos equipos. El programa complétase con imáxenes del Día d'América n'Asturies.

El sociu, aicionista y collaborador de Golaverage.com y ‘Naguando’ de RPA, Pablo Rodríguez Alonso, y Miguel Díaz Vigón, presidente de la Peña Sportinguista Redondo-Los Yerbatos, son los convidaos por parte roxiblanca d’esti programa qu’inaugura la segunda temporada de ‘Alderiques d’Asturies’, mentes que por parte azul acuden Nacio González, sociu, aicionista y tamién collaborador de ‘Naguando’ en RPA, y Berto Fernández Prado, de la Peña Embaxada Azul. Encárgase de moderar l’alderique’l periodista Pablo R. Guardado, redautor d’Asturies.com.

Los cinco falarán de l’actualidá de los dos equipos más representantivos del fútbol asturianu, asina como de dellos aspeutos d’actualidá d’interés pa los aficionaos, como’l preciu de les entraes, los horarios del fútbol profesional o la xestión de Javier Tebas al frente de la LFP. Amás el programa presentáu por Samuel Gradín va ufiertar les meyores imaxes del desfile del Día d'América n'Asturies, ente otros conteníos.

“Nesta nueva temporada sigue'l compromisu de facer un programa pa tolos asturianos y asturianes, en llingua asturiana y con conteníos variaos nel que l'ociu, l'entretenimientu, l'actualidá y les entrevístes van tar presentes”, espliquen dende Gomeru Producciones, empresa que s’encarga de producir ‘Alderiques d’Asturies’ pa MuyMuyTV en collaboración con Iniciativa pol Asturianu y Conocer Asturies. Esta canal emite na plataforma de cable Telecable y tien cobertoria per TDT nos conceyos de Gozón, Carreño, Xixón, Villaviciosa y Colunga.

Redifusión el domingu

La emisión de ‘Alderiques d’Asturies’ nesta segunda temporada va ser los sábados a les 19 hores, asina como los domingos a les 18 hores en redifusión.