La seca y la xuba del costu de los alimentos asitien a Etiopía al borde de la crisis humanitaria

"Demientres la comunidá internacional centra l'atención nes catástrofes naturales que dexaron decenes de miles de muertos y afeutaos en China y Birmania, les axencies de la ONU y delles ONGs vienen faciendo un llamáu d'atención sobre la situación d'Etiopía. Nesti país africanu hai lo menos trés millones de persones que necesiten ayuda alimentaria urxente pola seca que sufre'l país, según alvierte la Oficina de Coordinación de los Asuntos Humanitarios de la ONU.

Les axencies humanitaries camienten qu'Etiopía encara un déficit alimentariu valoráu en 147 millones de dólares (94,6 millones d'euros) y aseguren qu'hai falta de fondos p'actuar con urxencia porque tolos fondos tán empobinándose hacia China y Birmania.

Faciendo casu de los datos qu'apurre'l Fondu de Naciones Uníes pa la Infancia (UNICEF), la situación de los neños etíopes ye entá más preocupante. En dos rexones del país, 60.000 neños y neñes tán en riesgu de sufrir malnutrición aguda, situación que, según UNICEF, podría dir a pior si nun se fai un esfuerzu urxente.

El xefe de la unidá d'emerxencies de Médicos Ensin Fronteres, en declaraciones a la BBC, pidía un ""esfuerzu masivu"" de la comunidá internacional pa lluchar escontra la fame nesti país africanu. ""Nuna sola clínica tenemos 250 menores que nun van poder sobrevivir si nun reciben tratamientu urxente"", añadía.

La falta de lluvies, xunta coles males colleches y la xuba del preciu mundial de los alimentos asitia a los etíopes nesta situación tremendamente preocupante."