La Xunta acusa al FSA de "negar derechos en cuenta de reconocelos"

"La Xunta pola Defensa de la Llingua Asturiana acaba retrucar a les declaraciones emitíes por Jesús Gutiérrez, secretariu Xeneral de la Federación Socialista Asturiana, nes que manifestaba que'l so partíu conservará la posición contraria a la oficialidá del asturianu ""anque cueste un pactu de gobiernu"".

Arriendes d'ello la Xunta quier facer llegar delles reflexones, empobinaes sobre manera a la clas política asturiana, acerca de lo que camienta son ""unes gravísimes declaraciones"", que ""suponen un peligru pa la sobrevivencia del idioma"".

D'esti mou critiquen el posicionamientu de la FSA cuando compara ""los últimos resultaos electorales como una especie de referéndum sobre la oficialidá"", considerando que nestos comicios valoráronse otres cuestiones, ""los votantes nun taben decidiendo oficialidá sí, oficialidá non,como tol mundu sabe"".

Asina mesmo valoren como un ""fechu gravísimu"" qu'un altu cargu de la FSA declare ""asumir la inestabilidá del gobiernu asturianu con tal de nun contemplar la oficialidá"", porque, dende'l so puntu de vista ""la non oficialidá trai como consecuencia la desapaición de la llingua a mediu plazu, fechu sociolóxicu que ye de consensu dientro y fuera d'Asturies ente los especialistes y que los políticos d'otros territorios sabíen de sobra cuando apoyaron unánimemente la oficialidá de les sos llingües"".

Pa finar recuerden que ""n'Asturies tán conculcandose derechos fundamentales universales, amás de los que la Constitución Española reconoz a les llingües propies, y los asturianos y asturianes tán sufriendo l'agraviu comparativu col restu de los ciudadanos del estáu"", polo qu'acusen a la FSA de torgar derechos en cuenta de reconocelos."