"Les editoriales incumplen la normativa del currículu d'Asturies", asegura Riaño

El tratamientu de los llibros de testu de Secundaria y Bachilleratu a la llingua asturiana, catalogándola de dialeutu del castellanu o d'un idioma en desusu, crea polémica nesti aniciu del cursu al igual que n'años anteriores. "Les editoriales incumplen la normativa del currículu d'Asturies", asegura González Riaño, vicepresidente de l'ALLA.

Asturies.com faló con persones del mundu educativu y llingüísticu pa conocer por qué anguaño entovía nos institutos del país en clase de Lengua Castellana de Secundaria y Bachilleratu, etapes educatives onde s'estudia la diversidá llingüística del Estáu, l'asturianu tien esti tratamientu. Dende l'Academia de la Llingua Asturiana (ALLA), Xosé Antón González Riaño califica estes afirmaciones de "acientífiques" y rellacionales con "zunes qu'arrastramos del franquismu; una ideoloxía difícil de superar".

"Incúmplese la normativa institucional básica. Estos testos nun s'axusten al currículu asturianu de carauter preceptivu, qu'inclusive nel área de Lengua Castellana recueye al asturianu como llingua", añade'l vicepresidente de l'ALLA, que señala al Gobiernu como responsable de que se dea esta situación. "Tien les competencies educatives y debería facer un llabor de vixilancia permanente nesti tema", afirma, pa depués aseguar tener constancia de que ye un tema que se ta tratando anguaño dende la Conseyería d'Educación y Cultura, dalgo que pudo confirmar esti diariu dixital.

Iniciativa pol Asturianu ye'l coleutivu que más movió esta situación nes redes sociales, xubiendo semeyes de diferentes editoriales onde se podía comprobar esti esmoleciente tratamientu al nuesu idioma. Inaciu Galán, el so presidente, culpa de la situación "a la conseyería". "Nun debería permitise qu'estos llibros de testu tean nos centros asturianos", apunta pa depués recordar que yá en tiempos de Ramón d'Andrés como responsable de la política llingüística ellaboróse un informe al respeuto, "y más de diez años depués entovía nun se fixo nada".

Los profesores escueyen los llibros

Galán apunta que'l tratamientu al asturianu ye'l mesmu en toles editoriales, a esceición de dalguna más sensible cola llingua asturiana. "Táchenla de dialeutu históricu del castellanu y en dalgún casu tapécenla. Ye dalgo impresentable", asegura. Namái l'esfuerciu de profesores concienciaos, según rellata'l periodista y escritor, fai que los neños y neñes asturianos nun queden con esa visión "inventada" del idioma del país.

La escoyeta de los llibros que se dan en clase depende de los claustros de profesores o del departamentu del área, esplica Xosé Lluis Colodrón, del Sindicatu Unitariu Autónomu de Trabayadores de la Enseñanza d'Asturies (SUATEA), qu'apunta qu'estos conteníos "arrastrámoslos del pasáu y son pensamientos políticos y mediatizaos". Na so opinión, debería d'haber un organismu "que revise y controles estos conteníos tan sensibles nos llibros de testu, al igual que posibles comentarios sexistes, racistes o xenófobos".  

Al respeuto, apunta al propiu profesoráu "como'l posible primer filtru" pa evitar aquellos llibros de testos nos que se se dea un tratamientu falsu a la llingua asturiana, ensin escaecer que la responsabilidá de qu'esto nun asoceda recai dafechu na conseyería.