Los partíos enfrenten postures sobre competencies y financiación

"El voceru del PP y miembru de la ponencia de la reforma del Estatutu d'Autonomía na Xunta Xeneral del Principáu d'Asturies, Ovidio Sánchez, dixo esti llunes que ye partidariu de facer un artículu ""defensivu"" no que se refier a la financiación.

El voceru socialista, Fernando Lastra, ve bona sintonía nesi tema, y Jesús Iglesias (IX-BA-Verdes) pide un tribunal de la competencia autonómicu. Los trés ficieron eses declaraciones a los periodistes, tres participar nel conceyu de la ponencia estatutaria, onde se faló especialmente de competencies y de financiación.

El voceru popular mostróse partidariu d'una redaición que fuxa de los criterios que puean perxudicar al Principáu. Asina, nun descartó ""concretar"" criterios indicativos sobre financiación, siempre que valga pa ""defender"" los intereses del Principáu. El dirixente rexonal del PP llamentó que Cataluña siga ""marcando'l calendariu"" en rellación a los tiempos de negociación de financiación.

Asina, defendió l'actual modelu de financiación y refugó cualesquier modelu qu'implique una España ""de dos velocidaes"". Per otru llau, y en rellación a les competencies, Sánchez dixo que la reforma del Estatutu va valir pa qu'Asturies llegue al techu competencial que permita la Constitución, poniéndose al nivel que'l restu de les comunidaes autónomes.

Bona sintonía

Lastra, pela so parte, faló en tou momentu de ""criterios orientativos"", que nun seyan condicionantes. Recordó que va incluyise los criterios de la dispersión y l'avieyamientu, amás de la orografía y el grau d'intensidá de los servicios públicos. ""N'Asturies hai una mayor demanda de servicios públicos que n'otres comunidaes"", señaló Lastra, comentando qu'eso significa un gastu añadíu pa les arques rexonales.

Sobre'l marcu competencial, Lastra dixo que lo previsto pa la reforma va suponer qu'Asturies algame les mesmes condiciones qu'otres comunidaes autónomes. ""Nun se trata de facer diferencies con otros territorios"", recordó. Amás, defendió'l métodu de ""llistáu"" pola so precisión, énte'l métodu de ""materies y submateries"".

Tribunal de competencia

No que cinca a IX, Jesús Iglesias, dixo que'l so grupu parlamentariu ye partidariu de que'l futuru estatutu permita la posibilidá de crear un tribunal de la competencia, de calter rexonal.

El dirixente d'IX dixo que'l tribunal va tener como función defender a los consumidores nel Principáu, tal y como asocede con otros organismos d'esti tipu n'otros territorios o a nivel nacional. Punxo en rellación esta cuestión coles dos úniques competencies esclusives que, dixo, va incluyir la reforma no tocante al testu vixente: seguridá privada y consumu. Anunció que'l so grupu va facer un votu particular, demandando otra vuelta un nivel d'autogobiernu ""superior"".

Al contrario que PSOE o PP, Iglesias considera que lo previsto nun ye lo que tienen yá otres comunidaes. ""Nun queremos ser más, pero tampoco menos que'l restu de los ciudadanos"", manifestó. No que cinca a la financiación, Iglesias dixo que yá hai un primer borrador en rellación a la financiación, qu'incluye criterios como la dispersión de la población, la orografía o'l grau d'intensidá d'usu de servicios públicos."